پەیامی کورد     ...  ڕێکخراوەکانی مافی مرۆڤی ڕۆژهەڵاتی کوردستان لە بەیاننامەیەکدا تیرۆری "مووسا باباخانی" بە تووندی مەحکووم دەکەن

چوار ڕێکخراوی چالاکی مافی مرۆڤی ڕۆژهەڵاتی کوردستان بە بڵاو کردنەوەی بەیاننامەیەک تیرۆری "مووسا باباخانی" ئەندامی کۆمیتەی ناوەندی حیزبی دێموکراتی کوردستان بە تووندی ئیدانە دەکەن و داوای هەڵویستی جدی لە دامەزراوە جیهانییەکانی مافی مرۆڤ دەکەن و هەروەها دەخوازن دەزگای قەزایی و دامەزراوە تەناهییەکانی کوردستانی باشوور بە شێوەیەکی ڕوون و ئاشکرا بەدواداچوون بۆ کەیسی ئەو تیرۆرە بکەن.

دەقی بەیاننامەیەکە:

ڕۆژی پێنج شەممە، ١٤ی گەلاوێژی ٢٧٢١، “مووسا باباخانی”، ئەندامی ڕێبەرایەتی حیزبی دێموکڕاتی کوردستان لە هۆتیلێکی شاری “هەولێر” پایتەختی هەرێمی کوردستان تیرۆر کرا.

لێکۆڵینەوە سەرەتاییەکان دەریدەخەن کە تیرۆری ئەم چالاکە سیاسییە و ئەندامی کۆمیتەی ناوەندی حزبی دێموکراتی کوردستان، لە لایەن ڕێکخراوە ئەمنی و هەواڵگرییەکانی کۆماری ئیسلامی ئێرانەوە جێبەجێ کراوە.

 حکوومەتێک کە لە چەند دەیەی ڕابردوودا، تیرۆر و لەناوبردن، بەشێکی دانەبڕاو لە سیاسەتی ناوخۆیی و دەرەکییەکەی بووە.

ڕێکخراوەکانی مافی مرۆڤ لە کوردستان، هاوکات لەگەڵ ئیدانە کردنی تیرۆری مووسا باباخانی، داوا لە سەرجەم ڕێکخراوە نێودەوڵەتییەکانی مافی مرۆڤ و بە تایبەت ڕێپۆرتێرە بابەتییەکانی مافی مرۆڤ و یەک لەوانیش ڕێپۆرتێری تایبەتی مافی مرۆڤی ئێران دەکەن، بە سەرنجەوە گرینگییەکی تایبەت بەم بابەتە بدەن. هەروەها دامەزراوەکانی مافی مرۆڤ لە کوردستان، داوا لە دەزگا ئەمنی و دادوەرییەکانی حکوومەتی هەرێمی کوردستان دەکەن، بە هۆی گرینگی ئەو پرسەوە، شێلگیرانە و بە شەفافییەتەوە بەدوایدا بچن.

ئێمە وەک ژمارەیەک لە ڕێکخراوەکانی مافی مرۆڤی کوردستان، هاوکات کە پرسە و سەرەخۆشی خۆمان ئاراستەی نەتەوەی کورد دەکەین داواش لە سەرجەم لایەنە سیاسی و مەدەنی و مافی مرۆڤییەکان لە ئێران و کوردستان دەکەین لە بەرانبەر سیاسەتە توندوتیژەکانی حکوومەتی کۆماری ئیسلامی ئێران بێدەنگ نەبن و بە گوێرەی پێویست بەرانبەر بە بەردەوام بوونی کوشتار و تیرۆری چالاکانی سیاسی کورد، ناڕەزایەتی خۆیان دەرببڕن.

حکوومەتی کۆماری ئیسلامی ئیران لە سەرەتای دامەزرانییەوە هەتا ئێستا سەدان چالاکی سیاسی، مەدەنی و مافی مرۆڤی کوردی لە هەرێمی کوردستان و ووڵاتانی ئەورووپایی تیرۆر کردووە و بەردەوام بە هەڕەشە کردن لە چالاکانی مەدەنی و مافی مرۆڤ و چالاکانی سیاسی، خەریکی پلاندانان بۆ تیرۆر و لەناوبردنی چالاکانی کوردستانە.

تیرۆری چالاکانی سیاسی لە دەرەوەی کوردستانیش لە کاتێکدا بەڕێوە دەچی کە ئەم حکوومەتە لە ناوخۆی وڵات، لە ساڵانی ڕابردوودا هەزاران چالاکی سیاسی لە بەند کردووە و دەیان چالاکی سیاسیشی لە سێدارە داوە.

دەسەڵاتی دادوەری کۆماری ئیسلامی ئیران لە کوردستان تەنیا بەشێک لە دامەزراوە ئەمنییەکانە و لە بنەڕەتڕا هیچ سەربەخۆییەکی دادوەری نییە بە شێوەیک کە زۆرترین لقی دادگای شۆڕشی ئێران لە شارەکانی کوردستانە.

لە کۆتاییدا جارێکی دیکە تیرۆری مووسا باباخانی بە تووندی ئیدانە دەکەین و هەموو هەوڵی خۆمان بۆ بەدواداچوونی یاسایی بۆ دۆخی تراژدیکی مافی مرۆڤ لە کوردستان بە گشتی و ئەم تیرۆرە بە تایبەتی دەخەینە گەڕ.

◽️کۆمەڵەی مافی مرۆڤی کوردستان
◽️ناوەندی مافی مرۆڤ بۆ ڕۆژهەڵاتی کوردستان
◽️ڕێکخراوی مافی مرۆڤی هانا
◽️ڕێکخراوی مافی مرۆڤی هەنگاو

٢٠ی گەلاوێژی ٢٧٢١
١١ ئاگۆستی ٢٠٢١

ئەم بابەتە 11987 جار خوێندراوەتەوە