ژوورێكى هه‌ماهه‌نگى بۆ گرفتى سووته‌مه‌نى درووست ده‌كرێت
پەیامی کورد ... ژوورێكى هه‌ماهه‌نگى بۆ گرفتى سووته‌مه‌نى درووست ده‌كرێت
جێگرى سەرۆکی لیژنەی سامانە سرووشتییەکان و وزه و پیشه‌سازى لە پەرلەمانی کوردستان ده‌ڵێ، بڕیاره دواى جه‌ژنى قوربان ژوورێكى هه‌ماهه‌نگى بۆ ئیداره‌كردنى قه‌یرانى سووته‌مه‌نى له هه‌رێمى كوردستان درووست بكرێت، ئەویش لە پێناو ئەوەی گرفتى سووته‌مه‌نى درووست نه‌بێته‌وه.
گولیزار ڕه‌شید سندى، ڕایگەیاند : "بڕیارە دواى جه‌ژنى قوربان بۆ ئیدارەکردنی قەیرانی سووتەمەنی بەتایبەت بەنزین، ژوورێکی ھەماھەنگی وەک ژووری شانەی قەیرانەکان، یا ژووری ئۆپراسیۆن له هه‌رێمى كوردستان درووست بکرێت، تا ئیدارەی پرسى سووته‌مه‌نى بدرێت".
جێگری سەرۆکی لیژنەی سامانە سرووشتییەکان لە پەرلەمانی کوردستان ووتیشى:" ژوورەکە لە نوێنەری پەرلەمانى كوردستان و، وەزارەتی ناوخۆ، وەزارەتی سامانه سرووشتیه‌كانى حكوومه‌تى هه‌رێمى كوردستان و، پارێزگاکان پێكدێت".
گولیزار ڕه‌شید له‌باره‌ى ئامانج له درووستكردنى ئه‌م ژووره‌ش وتى:"درووستكردنى ئه‌م ژووره گرینگە بۆ ئەوەی جارێکی دیکە گرفت لەو بارەوە درووست نەبێتەوە، چوونكه ئامانج لەم ژوورە یەکخستنەوەی نرخ و چاودێری و ھێنانی بەنزین دەبێت بۆ ناوه‌وه‌ى هه‌رێمى كوردستان".
ئەم بابەتە 11988 جار خوێندراوەتەوە