پاش یەک هەفتە بەسەر داگیرکردنی ئەفغانستان لەلایەن گرووپی تاڵیبانەوە، بەرپرسی کۆمیسیۆنی یەکیتی ئەورووپا جەختی لەسەر ئەوە کردەوە کە یەکیتی ئەورووپا گرووپی تاڵیبان بە فەرمی ناناسێت و وتووێژ و دانیشتنی سیاسی لەگەڵ ئەو گرووپە ناکا.

ئۆرسۆلا فۆندێرلاین، بەرپرسی کۆمیسیۆنی یەکیتی ئەورووپا، ڕۆژی شەممە ٣٠ی گەلاوێژی ١٤٠٠ی هەتاوی لە کۆنفرانسێکی ڕۆژنامەڤانیدا ڕایگەیاند کە ئەوەی لە ئەفغانستان ڕوویداوە تراژیدییە و زلـلەیەکی تووند و بەهێزە بۆ کۆمەڵگەی نێونەتەوەیی و کۆمیسیۆنی یەکیتی ئەورووپا گرووپی تاڵیبان بە فەرمی ناناسێت.

ناوبراو لەدرێژەدا وتی: ئێمە دەبێ ئاگاداری بارودۆخی پەناخوازانی ئەفغانی بین و ڕێگە نەدەین کە ببنە قوربانی دەستی قاچاخچیانی مرۆڤ و دەبێ ئاسانکارییان بۆ بکەین کە بگەنە ووڵاتانی ئەورووپایی.

فۆندێرلاین لە دڕیژەدا سەرەڕای دەربڕینی نیگەرانییەکانی یەکیتی ئەورووپا لەهەمبەر پێشێلکردنی مافی مرۆڤ لە ئەفغانستان لەلایەن گرووپی تاڵیبانەوە وتی: یەکیتی ئەورووپا ئامادەیە هاوکاری ماڵی بدا بەو ووڵاتانەی کە پەناخوازە ئەفغانییەکان لەخۆ دەگرن.