پەیامی کورد     ...   کۆمیسیۆن کاتی ڕاگەیاندنی دەرئەنجامی کۆتایی هەڵبژاردنەکانی ڕاگەیاند

بەرپرسی ئۆفیسی کۆمیسیۆنی باڵای سەربەخۆی ھەڵبژاردنەکانی عێراق لە دھۆک ووتی، کۆمیسیۆن ئەنجامەکانی ھەڵبژاردنی تەواو کردووە و ھیچ کێشەیەکی نەبووە و بڕیاریشە ئەم ھەفتەیە ئەنجامی کۆتایی ڕابگەیندرێت.

خالد عەباس، بەرپرسی ئۆفیسی کۆمیسیۆنی باڵای سەربەخۆی ھەڵبژاردنەکانی عێراق لە دھۆک، ڕایگەیاند : ''پرۆسەی ھەڵبژاردن زۆر باش و بێ گرفت بەڕێوە چوو و ھیچ کێشەیەک نەبوو و لای ئێمە ھیچ گۆڕانکاریەکیش ڕووی نەداوە و ئەگەر ھەر گۆڕانکارییەکیش ھەبێت بۆ مەرامی سیاسی و دەستوەردان بووە لە دەستەی دادوەری، چوونکە ئەنجامەکان نێردراون بۆ لای ئەوان.''

بەرپرسی ئۆفیسی کۆمیسیۆنی باڵای سەربەخۆی ھەڵبژاردنەکانی عێراق لە دھۆک ووتیشی: ''ھۆکاری دواکەوتنی ڕاگەیاندنی ئەنجامی ھەڵبژاردنەکانیش بۆ ئەوە دەگەڕێتەوە ھەندێک تانەی لێ درا و ھەندێک پرسی سیاسیش ھاتنە ناو پرۆسەکە و ئەمە وای کرد ئەنجامەکان دوا بکەون، بۆیە ئەم ھەفتەیە ئەنجامی کۆتایی ڕادەگەیندرێت.''

عەباس ڕوونیشی کردەوە: ''کۆمیسیۆن ھیچ کێشەیەکی نەبووە و ھەر گۆڕانکارییەکی بکرێت ئەوە ھەندێک دەقی یاساییان بۆ خۆیان دۆزیوەتەوە، چوونکە ئێمە کێشەمان نەبووە و گۆڕانکاری نەبووە، بۆیە ناکرێت ئێستا باسی گۆڕانکاری بکرێت، چوونکە پرۆسەکە بێ کێشە بەڕێوە چووە و دەنگی ھەموو لایەنەکان دیار بوو، بەڵام دەستەی دادوەری ڕەنگە بۆ بەرژوەندی ھەندێک لایەن و شەقام ئەگەر گۆڕانکاری بکات، کە ئەمەش یاسایی نییە.''

ئەم بابەتە 11987 جار خوێندراوەتەوە