پەیامی کورد      ...   گرژی و ئاڵۆزی دەکەوێتە نێوان هێزەکانی حێزبی کۆمەڵەی زەحمەتکێشانی کوردستان ی ئێران و  هێزەکانی " پەکەکە "

پەکەکە ڕێگرى دەکات دەبێتە بەربەست لە چوونەوەى پێشمەرگەکانى کۆمەڵە بۆ نێو ڕۆژهەڵات

ئێوارەى دوێنێ شەوى شەممە ڕێکەوتى ٦ى تەمووزى ٢٠٢١ى زایینى ،له‌ گوندی هێردن ی نزیك چیای سه‌قه‌رى سیدەکانى باشوورى کوردستان، لە نێوان پۆلێک لە پێشمەرگەکانى کۆمەڵەى زەحمەتکێشانى کوردستانى ئێران (کۆمەڵە) و گەریلاکانى پارتى کرێکارانى کوردستان (پەکەکە) گرژى درووست بوو.

 فەرماندەیەکى کۆمەڵەى زەحمەتکێشانى کوردستانى ئێران کە نەیویست ناوى ئاشکرا بێت، ڕاگەیاند "لە کاتى هاتووچۆى پێشمەرگەکانمان بۆ ناوخۆى ووڵات، چەکدارەکانى پەکەکە پێشیان پێ گرتوون و پێیان ووتوون نابێت ئێوە هاتووچۆى ئێران بکەن".
هەرچەندە هەندێک میدیا باسیان لەوە کردووە کە بە هۆى ئەم بەرپێگرتنەى گەریلاکانى پەکەکە چەند کاتژمێرێک تەقە کراوە لە یەکتر، بەڵام فەرماندەکەى کۆمەڵە باسى لەوە کرد کە "بە هۆى ئەم ڕێگرییەوە دەمەقاڵە و گرژییەک لە نێوان پێشمەرگەکانمان و گەریلاکاندا درووست دەبێت، بەڵام تەقەى تێ نەکەوتووە".

شایەنى باسە ئەمە یەکەم جار نییە کە لە نێوان پەکەکە و هێزەکانى ڕۆژهەڵاتى کوردستاندا گرژى درووست دەبێت و لە ماوەى ڕابردوو و لە کاتى دەستپێکردنەوەى ڕاسانى حیزبەکانى ڕۆژهەڵاتى کوردستان و ناردنەوەى هێزى پێشمەرگە بۆ ناو خۆى ئێران، چەندین جار گرژى و تەقە لە نێوان گەریلاکانى پەکەکە و پێشمەرگەکانى ڕۆژهەڵاتدا درووست بووە و تەنانەت خوێنیشى تێ کەوتووە. 

  بە ئاشکراکردن و لەقاودانى پەیوەندییەکانى گەورە بەرپرسانى پەکەکە لەگەڵ کۆمارى ئیسلامى، زانیارى بڵاو کراوەتەوە کە پەکەکە بە هۆى نزیکایەتى لە کۆمارى ئیسلامى و بوونى بارەگاکانیان لە تەنیشت بارەگاى سوپاى پاسداران و پاراستنى سنوورەکانى ئێران لە لایەن پەکەکەوە، ڕێگرى زۆر کراوە لە خەباتى چەکدارى ڕۆژهەڵاتى کوردستان.

ئەم بابەتە 11989 جار خوێندراوەتەوە