پەیامی کورد     ...   ھەر ناوچەیەك كێشەی ئاوی ھەبێت پارەی بۆ خەرج دەكرێت

هەفتەی رابردوو سەرۆكی حكوومەتی ھەرێمی كوردستان گوژمەیەك پارەی بۆ بەرەنگاربوونەوەی وشكەساڵی دابین كرد، بەڕێوەبەری گشتیی ئاوی ھەرێمی كوردستانیش دەڵێ، ھەر ناوچەیەك كێشەی ئاوی ھەبێت، پارەی بۆ خەرج دەكرێت.

ئاری ئەحمەد، بەڕێوبەری گشتی ئاوی ھەرێمی كوردستان، راگەیاند: "ئەو دوو ملیار و ٥٠٠ ملیۆن دینارەی سەرۆكی حكوومەتی ھەرێمی كوردستان بۆ وشكەساڵی خەرجی كردووە، ھەموو بۆ دابینكردنی ئاوی خواردنەوەیە، ئێمە پلانمان ئەوەیە پارەكە بۆ لێدانی بیری نوێ و ئەو بیرانە تەرخان بكەین كە بە ھۆی ووشكەساڵی وشك بوونە لەگەڵ گۆڕینی ئامێرەكان و دابینكردنی تانكەر بۆ دابینكردنی ئاوی پاك و چەندین خزمەتگوزاری دیكەش بەو پارەیە جێبەجێ دەكرێن".

بەڕێوبەری گشتی ئاو ووتیشی: "بە ھۆی زیادبوونی خواست لەسەر ئاوی خواردنەوە و ووشكەساڵی، قەیرانی كەمی ئاو لە ھەندێ ناوچە و شار و گەڕەك پەیدا بووە، بەڵام ھەوڵەكانی ئێمە بەردەوامن بۆ چارەسەركردنی كێشەی ئاو".

ئاری ئەحمەد ئاماژەی بۆ ئەوەش كرد: "ئێمە رۆژانە دوو ملیۆن مەتر چوارگوشە ئاوی پاك بەرھەم دێنین، كە بۆ ھەر ھاووڵاتیەك رۆژانە نزیكەی ٣٥٠ لیتر ئاو دابین دەكرێت، ئەو رێژەیەش زۆر لە سەرەوەی ستانداردی جیھانییە، چوونكە بە گوێرەی ستانداردی جیھانی، ھەر مرۆڤێك رۆژانە پێویستی بە ٢٠٠ تا ٢٥٠ لیتر ئاو ھەیە، بەداخەوە نەبوونی كارەبای نیشتیمانی بە بەردەوامی و وشكەساڵی، ھۆكارن بۆ سەرھەڵدانی كێشەی ئاو، لەگەڵ ئەوەشدا ھاووڵاتیانیش وەك پێویست دەست بە ئاوەوە ناگرن".

ئەم بابەتە 11990 جار خوێندراوەتەوە