پەیامی کورد     ...   یاسایەک لە هەرێمی کوردستان هەموار دەکرێتەوە

ماوەی چەند ساڵێکە کار بۆ ھەموارکردنەوەی یاسای داواکاری گشتی دەکرێت و ئەندامێکی داواکاری گشتی یش پێی وایە، دوای ھەموارکردنەوەی یاساکە، ڕۆڵی داواکاری گشتی زیاتر دەبێت.

د. محەمەد ڕێکانی، ئەندامی داواکاری گشتی ، ڕایگەیاند: "پڕۆژە پێشنیازێک لەلایەن ڕێکخراوی ئەمریکی بۆ ھەموارکردنەوەی یاسای داواکاری گشتی ئامادە کراوە و بۆچوونی دادوەرانی داواکاری گشتی یش لە ھەموو ھەرێمی کوردستان وەرگیراوە، بەڵام ھێشتا پڕۆژەکە نەبووەتە پڕۆژەیەکی فەرمی، لەگەل ئەوەشدا خاڵی زۆر بەھێزی تێدایە بۆ ئەوەی دەسەڵات و ڕۆڵی زیاتر بە دەزگای داواکاری گشتی بدرێت، تا داواکاری گشتی وەک پێویست ڕۆڵی ھەبێت.''

ئەندامەکەی داواکاری گشتی دەشڵێت: "یاسای داواکاری گشتی لە ھەرێمی کوردستان لە ساڵی ١٩٧٩ دەرکراوە و لە ھیچ ووڵاتێکی جیھان، تەنانەت عێراق خۆشی جێبەجێی ناکات و ساڵی ٢٠١٧ یاسایەکی نوێی بۆ داواکاری گشتی دەرکردووە.''

د. محەمەد ڕێکانی ئاماژەی بۆ ئەوەش کرد: "ھەرێمی کوردستان پێویستی بە یاسایەکی نوێ و سەردەمیانە ھەیە بۆ داواکاری گشتی، ئەگەر یاساکە ھەموار بکرێتەوە ئەوکات داواکاری گشتی دەتوانێت زیاتر کارا بێت لە جێبەجێکردنی ئەرکەکانی، بەتایبەتی لە چاودێریی دادوەران و بەرەنگاربوونەوەی گەندەڵی، ئێمە وەک ئەندامانی داواکاری گشتی ھیچ کێشەیەکمان نییە کە داوای ھەموارکردنەوەی یاسا دەکەین، تەنیا دەمانەوێت زیاتر کار بۆ خزمەتی گشتی بکەین.''