Li Îranê 14 ton çek hatin girtin

PeyamaKurd – Hêzên ewlehiyê yên Îranê li parêzgeha “Azerbaycana Rojava” (Rojhilatê Kurdistanê) dest danîn ser barhilgirekî ku nêzîkî 14 ton çek û alavên êrîşê tê de bûn.

Di nav barê hatî girtin de zêdetir çekên mîna “dar, xencer, kêr, çekên şokê û perçeyên çekan” hene ku pispor dibêjin ev cure amûr piranî di “aloziyên sivîl û xwepêşandanên kolanan” de tên bikaranîn.

Her çend heta niha delîleke fermî nehatiye pêşkêşkirin jî, gumanên mezin hene ku ev sewqiyat ji aliyê “Mossadê” ve hatibe organîzekirin daku ewlehiya navxweyî ya welat têk bibe.

Di operasyonê de “welatiyekî biyanî” hat girtin û lêpirsîn li ser wî berdewam dike. Pisporên herêmî destnîşan dikin ku ev desteserkirina mezin di demekê de ye ku rageşiya îstîxbaratî ya di navbera Îsraîl û Îranê de di asta herî bilind de ye û Tehran dixwaze peyama “amadebaşiya bilind” bide raya giştî.