Netanyahû: Hewldanên ji bo bêçekkirina Hizbullahê têrê nakin

PeyamaKurd – Nivîsgeha Serokwezîrê Îsraîlê Benjamîn Netanyahû ragihand ku hewildanên hikûmet û artêşa Lubnanê yên ji bo bêçekkirina Hizbullahê "hêvîdar in lê bi tu awayî têrê nakin." Îsraîl îdia dike ku Hizbullah bi piştgiriya rasterast a Îranê hewl dide binesaziya xwe ya leşkerî ji nû ve ava bike. Di daxuyaniyê de hat tekezkirin ku li gorî peymana agirbestê ya bi navbeynkariya Amerîkayê, divê Hizbullah bi temamî were bêçekkirin da ku ewlehiya herêmê pêk were.

Li aliyê din, artêşa Lubnanê ragihand ku qonaxa yekem a plana "Mertala Welat" (Shield of the Homeland) bi serkeftî bi dawî bûye û gihîştiye armancên xwe. Li gorî daxuyaniya artêşê, wan hebûna xwe ya leşkerî li başûrê Çemê Lîtanî zêde kiriye, deverên stratejîk ewle kirine û dest bi paqijkirina tunel û teqemeniyan kirine. Rayedarên Lubnanî diyar dikin ku ev plan dê bibe bingehek ji bo qonaxên bê da ku hemû çek bikevin bin kontrola dewletê.

Lê belê, artêşa Lubnanê balê dikişîne ser hinek astengiyên sereke û Îsraîlê tawanbar dike. Hat diyarkirin ku êrîşên berdewam ên Îsraîlê, avakirina herêmên tampon û binpêkirinên rojane yên agirbesta 27ê Mijdara 2024an, bandoreke neyînî li ser xebatên bêçekkirinê dikin. Artêş dibêje ku dagîrkeriya Îsraîlê ya li hin deveran rê li ber damezrandina desthilatdariya tam a dewletê digire.