SOHR: Li deverên kontrola Samê li ser dîwaran nivîsên DAISê hene

PeyamaKud- Çavdêriya Mafên Mirovan a Sûriyê (SOHR) ragihandi ku li gundewarên Dêrazorê yên di bin kontrola hikûmeta Şamê de, nivîsên DAIŞê li ser dîwaran hatin dîtin.

SOHRê li ser mijarê eşkere kir, li bajarokê El-Qûriya û dibistaneke bajarokê Mehkan ev nivîsên têkildarî rêxistina terorîst DAIŞê hatine nivîsandin.

Çavdêriyê destnîşan kir ku di nivîsan de gef li welatiyan tê kirin û tê gotin: “Gelî xaçperestan, Dewleta Îslamê dê vegere”, “Dewleta Îslamê her heye”.

Hate diyarkirin, piştî dîtina van nivîsan jî fikar û tirsek mezin di nava welatiyên her du bajarokan de çêbûye.

SOHRê da zanîn, ev kiriyar nîşan dide ku şaneyên DAIŞê li herêmên di bin desthilatdariya hikûmetê de bi serbestî tevdigerin.

Hêjayî gotinê ye berî niha jî li gundewarên Şam, Heleb, Hema û bajarokê El Bûkemalê, heman nivîs hatibûn dîtin.