Daxuyaniyeke nû li ser rewşa tenduristiyê ya Selim Sadak hat dayîn

PeyamaKurd – Hakzan Sadak, kurê siyasetmedarê Kurd Selim Sadak, derbarê rewşa tenduristiyê ya bavê xwe de daxuyaniyek da û got, "Nûçeyên spekulatîf rastiyê nîşan nadin."

Parêzer Hakzan Sadak li ser hesabê xwe yê medyaya civakî derbarê nûçeyên li ser rewşa tenduristiyê ya bavê wî Selim Sadak, ku dermankirina penceşêrê dibîne, agahî da.

Sadak diyar kir ku dermankirina Selim Sadak di beşa lênêrîna giran de berdewam dike û got, "Her çend xetereya jiyana wî hebe jî, ez dikarim bibêjim ku tenduristiya wî bi awayekî erênî pêş dikeve. Nûçeyên spekulatîf ên derveyî rastiyê nîşan nadin. Em spasiya xwe ji hemî hevalên wî, hezkiriyên wî û gelê me re dikin ku di vê pêvajoya dijwar de bavê min bi tenê nehiştin, telefon kirin û daxwazên xwe yên baş pêşkêş kirin. Ji kerema xwe wî di duayên xwe de bihêlin."

Parlamenterê DEPê yê berê û Şaredarê Sêrtê yê berê yê 71 salî Selîm Sadak ku demek dirêj li Heilbronn a Almanya bi nexweşiya pençeşêrê re têdikoşiya, piştî ku rewşa tenduristiya wî xerab bû, êvara Înê 19ê Kanûnê rakirin nexweşxaneyê.