Qedexeya derketina derve li Hesekê û Qamişloyê hat ferzkirin

PeyamaKurd - Hêzên Ewlekariya Navxweyî yên Kantona Cîzrê biryar dan ku li bajarên Hesekê û Qamişloyê qedexeyên derketina derve ferz bikin.

Hêzên Ewlekariya Navxweyî yên Kantona Cizîrê di heyameke krîtîk de ku herêm di guhertinên ewlehî û siyasî yên hesas re derbas dibe, ev tedbîr bicîh anîne. Di çarçoveya hewldanên parastina ewlehî û aramiyê û misogerkirina ewlehiya welatiyan de, li Hesekê û Qamişloyê qedexeya derketina derve hat ragihandin.

Li gorî daxuyaniyek ku îro ji aliyê Hêzên Ewlekariya Navxweyî ve hat dayîn, qedexeya derketina derve li Hesekê wê ji saet 6:00 sibê heta 6:00 êvarê roja Duşemê, 2ê Sibata 2026an be.

Li Qamişloyê, biryar wê roja Sêşemê, 3ê Sibata 2026an, herwiha ji saet 6:00 sibê heta 6:00 êvarê bê bicîhanîn.

Di daxuyaniyê de tekez hat kirin ku divê hemû welatî bi tevahî şertên vê biryarê bi cîh bînin û divê her kes li gorî rênimayan tevbigere.

Herwiha hat gotin ku her kesê ku biryarê binpê bike wê were lêpirsînkirin û tedbîrên qanûnî yên tund werin girtin.

Ev tedbîra ewlehiyê ji bo afirandina hawîrdorek guncaw ji bo hêzên ewlehiyê hat girtin da ku erkên xwe yên parastina herêmê û welatiyên wê bi awayê çêtirîn pêk bînin.