Rêveberiya Xweser a Rojava gulebarankirina li xwepêşanderan şermezar kir

PeyamaKurd – Rêveberiya Xweser a Rojava bikaranîna tundûtûjiyê li dijî xwepêşanderên Elewî li bajarên Sûriyê yên Lazkiye û Tartusê şermezar kir.

Rêveberiya Xweser hişyarî da ku polîtîkayên hikûmeta demkî ya Sûriyê ber bi şerê navxweyî ve diçin û daxwaza Sûriyeyek nenavendî kir.

Rêveberiya Xweser a Bakur û Rojhilatê Sûriyê (Rojava) derbarê alozî û êrîşên dawî yên li ser sivîlan li herêmên peravê yên Sûriyê yên ku piraniya wan Elewî ne, daxuyaniyek nivîskî weşand.

Rêveberiya Rojava diyar kir ku ew bi fikareke kûr pêşketinên li herêma peravê ya Sûriyê û hin deverên di nav welêt de dişopînin, piştî xwepêşandanên aştiyane ku mafên rewa yên gelê Sûriyê, wek azadî û rûmetê, dixwazin û daxwaza avakirina Sûriyeyek demokratîk û federal dikin ku edalet û wekheviyê ji bo hemî welatiyên xwe garantî dike.

"Mudaxeleya hêzên Hikûmetê"

Rêveberiya Xweser a Demokratîk a Bakur û Rojhilatê Sûriyê di daxuyaniya xwe de diyar kir ku "hêzên girêdayî Hikûmeta Veguhêz a Sûriyê ji bo tepeserkirina van xwepêşandanên aştiyane mudaxele kirin, li dijî xwepêşanderan hêzek zêde bi kar anîn, û di encama pratîkên ku tê de karanîna çekan jî heye, gelek sivîlên bêguneh canê xwe ji dest dan û birîndar bûn." Di daxuyaniyê de hat gotin ku "em vê rewşê bi tundî şermezar dikin û ew binpêkirineke eşkere ya mafê Sûriyan e ku bi aştiyane nerîn û daxwazên xwe yên rewa derbibirin."