Pêşmerge li Silêmaniyê dronek xist xwarê!
PeyamaKurd - Li Silêmaniyê, nêzîkî Fermandariya Hêzên 70emîn, Pêşmergeyan wesayîteke hewayî ya bêmirov (UAV) xistin xwarê. Di bûyerê de ti qurbanî an zerar nehat ragihandin.
Berdevkê Fermandariya Hêzên 70emîn Ehmed Latîf diyar kir ku doh êvarê li dora saet 22:45an li ser avahiya fermandariyê UAVek hatiye tespîtkirin û ji aliyê hêzên ewlehiyê ve hatiye xistin.
Latîf diyar kir ku UAV li deverek dûr ketiye û tu ziyan çênebûye.
Ev êrîş wekî berdewamiya bûyerên bi vî rengî tê hesibandin ku di hefteyên dawî de li seranserê Herêma Kurdistanê zêde bûne.
Di şeva 1ê Tîrmeha 2025an de, du êrîşên cuda yên bi dron li Silêmaniyê çêbûn. Yek li herêma Tasluceyê ket û ya din jî li cihekî nêzîkî baregeha Hêzên Komando û Dijî Terorê yên Hêzên 70emîn ket.
Piştî bûyerê, Rêxistina Ewlehiyê ya Herêma Kurdistanê ragihand ku lêpirsîn hatiye destpêkirin û hewldanên ji bo destnîşankirina çavkaniya droneyan berdewam dikin.
