پەیامی کورد   ...   میدیاکانی ئەمریکا : نوێنەری ترامپ ڕۆژی هەینی لەگەڵ پووتین کۆدەبێتەوە

ماڵپەڕی ئاکسیووس لە زاری بەرپرسێکی ئەمریکییەوە ڕۆژی چوارشەممە بە کاتی ناوخۆی ووڵاتەکەی ڕایگەیاندووە کە بڕیارە ڕۆژی هەینی ستیڤ ڤیتکۆف نوێنەری تایبەتی ئەمریکا لە ئۆکراین و ڕۆژهەڵاتی ناوەڕاست لەگەڵ ڤلادێمیر پووتین سەرۆکی ڕووسیا کۆببێتەوە و وتووێژ بکات.

میدیا ئەمریکییەکان دەشڵێت: هیچ نیشانەیەک نییە کە ڕێککەوتنێک نزیک بێت، بەتایبەتی کە ئۆکراین پلانەکەی ترامپ ی ڕەتکردووەتەوە و بەرپرسانی باڵای ئەمریکا بەشدارییان لە دانووستانەکانی ڕۆژی چوارشەممەی لەندەن نەکرد کە بڕیار بوو لەگەڵ ئۆکراینییەکان باسی پێشنیارەکەی ترامپ بکەن.

ئاکسیووس بە پشت بەستن بە سەرچاوەیەکی نزیک لە حکوومەتی ئۆکراین ڕایگەیاند، کیێڤ پێشنیارەکەی ترامپ بە لایەنگرییەکی زۆر بەرامبەر بە ڕووسیا دەبینێت، مۆسکۆ سەرکەوتنی یەکلاکەرەوەی بەدەست هێناوە و کیێڤ تەنها بەڵێنی ناڕوونی داوە.

سەرچاوەیەکی دیکە بە ئاکسیووسی ڕاگەیاند، مارکۆ ڕۆبیۆ، وەزیری دەرەوەی ئەمریکا لە دانووستانەکانی ئۆکراین کە ڕۆژی چوارشەممە لە لەندەن بەڕێوەچوو، هاتە دەرەوە، دوای ئەوەی ڕوون بووەوە کە ئۆکراین دەیەوێت تاوتوێی پێشنیازی پێشووی ترامپ بکات بۆ ئاگربەست بۆ ماوەی 30 ڕۆژ لە جیاتی چوارچێوە نوێیەکەی بۆ ئاشتی.

ڕاپۆرتەکان ئاماژە بەوە دەکەن کە پووتین پێشنیاری سەقامگیرکردنی هێڵەکانی شەڕی ئێستای کردووە بەمەبەستی گەیشتن بە ڕێککەوتن، هەرچەندە پێشتر دژایەتی بەشێکی دیکەی پلانەکەی ئەمریکای کردووە، وەک جێگیرکردنی هێزی ئاشتی پارێز لەسەر خاکی ئۆکراین .

ئەندری یەرماک، سەرۆکی ئیدارەی سەرۆکایەتی ئۆکراین ڕۆژی چوارشەممە لە لەندەن لەگەڵ دیپلۆماتکارە باڵاکانی بەریتانیا، فەرەنسا و ئاڵمانیا کۆبووەوە و پلانی ئەمریکا تاوتوێ کرد.

ئەمریکا بەشداری لەم کۆبوونەوەیەدا نەکرد. دوای کۆبوونەوەکە، یەرماک ووتی، "ئۆکراین پابەندە بە هەوڵەکانی ترامپ بۆ ئاشتی"، بەڵام جەختی لەوە کردەوە کە "ڕووسیا بەردەوامە لە دژایەتیکردنی ئاگربەستی بێ مەرج و درێژکردنەوەی پرۆسەی دانووستان و هەوڵدان بۆ دەستکاریکردنی دانووستانەکان".

ڕۆژی چوارشەممە بە کاتی ناوخۆی ئەمریکا، دۆناڵد ترامپ، سەرۆکی ئەمریکا لە هەژماری سۆشیال میدیای خۆیدا، لە تویتێک دا لە هەژماری تایبەتی خۆیدا بە ناوی "ڕاستی کۆمەڵایەتی: ڤۆلۆدیمیر زێلێنسکی سەرۆکی ئۆکراین بە شانازییەوە لە لاپەڕەی یەکەمی ڕۆژنامەی وۆڵ ستریت ژۆرناڵدا دەڵێت: "ئۆکراین بە شێوەیەکی یاسایی دان بە داگیرکردنی کریمەدا نانێت". "هیچ شتێک نەماوە لێرە باسی بکەین." ئەم قسانە زۆر زیانبەخشن بۆ دانوستانەکانی ئاشتی لەگەڵ ڕووسیا، بەو پێیەی کریمیا ساڵانێک لەمەوبەر لە سەردەمی سەرۆک باراک حسێن ئۆبامادا لەدەستچوو و تەنانەت بابەتی گفتوگۆش نییە.

سەرۆکی ئەمریکا زیادی کرد: کەس داوا لە زێلێنسکی ناکات کریمە وەک خاکی ڕووسیا بناسێت، بەڵام ئەگەر کریمای دەوێت، بۆچی 11 ساڵ لەمەوبەر لە کاتێکدا ڕادەستی ڕووسیا کرا، بەبێ ئەوەی یەک تەقە بکرێت، کریمە خەباتی بۆ نەکرد؟

ترامپ ڕوونیکردەوە کە ناوچەکە ساڵانێک پێش ئەوەی "ئۆباما ڕادەستی بکات" بنکەی گەورەی ژێردەریایی ڕووسیای تێدابووە. ئەوە لێدوانی ئیستفزازی وەک زێلێنسکی یە کە چارەسەرکردنی ئەم شەڕە زۆر قورس دەکات. هیچ شتێکی نییە شانازی پێوە بکات!