پەیامی کورد   ...   گەنجینەی ئەمریکا سزای نوێی بەسەر ئێران دا سەپاند

وەزارەتی گەنجینەی ئەمریکا ڕایگەیاند: سزامان بەسەر گەورە بازرگانێکی ئێرانی دا سەپاندووە، کە بەرپرسە لە هەناردەکردنی گازی شل و نەوتی خاوی ووڵاتەکە بۆ بازاڕەکانی جیهان.

وەزارەتی گەنجینەی ئەمەریکا، لە ڕاگەێندراوێکدا، ئاماژەی بەوە دا، سەید ئەسعەدۆڵڵا ئیمام جومعە، گەورە بازرگانی گازی شل و تۆڕی کۆمپانیاکانی خستوونەتە لیستی سزاکانیانەوە.

گەنجینەی ئەمریکا دەڵێت: سەید ئەسعدوڵڵا بەرپرسە لە هەناردەکردنی گازی شل و نەوتی خاوی ئێران بۆ بازاڕەکانی جیهان، کە بە بەهای سەدان ملیۆن دۆلار دەبێت.

وەزارەتەکە ڕاشیگەیاند: ئەو گەورە بازرگانە ئێرانییە، تەنانەت هەوڵی ئەوەشی داوە گازی شل هەناردەی بازاڕەکانی ئەمریکاش بکات، تا خۆی لە سزاکانی ووڵاتەکە بدزێتەوە.

وەزارەتەکە دەشڵێت: "ئێران هاوشان لەگەڵ نەوتی خاو، داهاتی گازی شلیش بۆ پەرەپێدانی چەک و بەرنامە ئەتۆمییەکەی بەکار دەهێنێت".