سەرۆکی حکوومەت پێشوازی له‌ باڵیۆزى نوێى كۆریاى باشوور له‌ عێراق كرد

پەیامی کورد   ...   سەرۆکی حکوومەت پێشوازی له‌ باڵیۆزى نوێى كۆریاى باشوور له‌ عێراق كرد

باڵیۆزی نوێی کۆریای باشوور لە کۆبوونەوەیەک دا لەگەڵ سەرۆکی حکوومەتی هەرێمی کوردستان، ستایشی پێشکەوتن و ئاوەدانیی هەرێمی کوردستانی کرد و بە بۆنەی سەرکەوتنی چاکسازییەکانی حکوومەتی هەرێمی کوردستان، دەستخۆشی لە سەرۆکی حکوومەت کرد.

دوو‌شەممە‌ 11/17، مەسروور بارزانى، سه‌رۆكى حکوومەتی هه‌رێمى كوردستان، پێشوازی له‌ لى جۆن ئیل، باڵیۆزى نوێى كۆریاى باشوور له‌ عێراق كرد.

سەرۆکی حکوومەت وێڕای پیرۆزبایی کردن له‌ باڵیۆز، ئاماژەی بە دۆستایەتی و پەیوەندی لەمێژینەی نێوان هەرێمی کوردستان و کۆریا کرد و هه‌موو پشتیوانییەکی حکوومەتی هه‌رێمى كوردستانى بۆ پەرەپێدانی زیاتری پەیوەندی دوولایەنە دەربڕی.

باڵیۆزی کۆریا، ستایشی پێشکەوتن و ئاوەدانی هەرێمی کوردستانی کرد و خواستی ووڵاتەکەی بۆ پێشخستنی پەیوەندییەکان لەگەڵ هەرێمی کوردستان، لە بوارە جۆراوجۆرەکاندا دووپات کردەوە.

باڵیۆزی کۆریا، پیرۆزبایی سەرکەوتنی هەڵبژاردنی ئەنجوومەنی نوێنەرانی عیراق و هەروەها دەستخۆشی ئەنجامدانی پڕۆژە و سەرکەوتنی چاکسازییەکانی حکوومەتی هەرێمی کوردستانیشی بۆ بونیاتنانی ژێرخانێکی بەهێزی ئابووری، لە سەرۆکی حکوومەت کرد.