ڕەوەندی جوولەکە کوردەکان لە ئیسرائیل : ناتانیاهوو بێ دوودڵی پشتگیری لە کوردەکان بکات

پەیامی کورد    ...   ڕەوەندی جوولەکە کوردەکان لە ئیسرائیل : ناتانیاهوو بێ دوودڵی پشتگیری لە کوردەکان بکات

ڕاگەێندراوی سەرۆکی ڕەوەندی کوردی لە ئیسرائیل :

 بۆ خوشک و برا کوردەکانمان لە ڕۆژئاوا، حەلەب، ڕۆژهەڵات و لە تاراوگە بەناوی ڕەوەندی جووی کوردستان ەوە، لەم کاتە سەختانەدا هاوسۆزی تەواوی خۆمان بۆ خوشک و برا کوردەکانمان لە سەرتاسەری کوردستان و لە تاراوگە دەردەبڕین. بە تووندترین شێوە ئەو کۆمەڵکوژییەی لە حەلەب ڕوویدا شەرمەزار دەکەین، کە لەلایەن دەوڵەتی تورکیا و گرووپە جیهادییەکانەوە دژی هاووڵاتیانی مەدەنی کورد، لەنێویاندا ژنان و منداڵان، ئەنجامدرا.

 ئێمە بە تووندی لە پشتیان ڕادەوەستین و داوا لە سەرۆک وەزیرانمان، بێنیامین ناتانیاهوو و هەموو ئەندامانی حکوومەتی ئیسرائیل دەکەین، بەبێ دوودڵی پشتگیری لە خوشک و برا کوردەکانمان بکەن و هەموو ئامرازە پێویستەکان بەکاربهێنن بۆ کۆتایی هێنان بەو تاوانە بەردەوامانەی کە دژی گەلی کورد ئەنجام دەدرێن؛ ئەو گەلەی کە لە حەلەب و لە سەرتاسەری سووریا ڕووبەڕووی هێرشی بەردەوامی هێزە جیهادییەکانی هاوشێوەی حەماس بووەتەوە. 

هەروەها دەمانەوێت هاوسۆزی خۆمان بۆ خوشک و برا کوردەکانمان لە ڕۆژهەڵات (کوردستانی ئێران) دەرببڕین، کە بە ئازایانە ڕووبەڕووی ڕژێمی سەرکوتکەری مەلاکان دەبنەوە. 

سڵاو و نزا و پاڕانەوەی ڕاستگۆیانەی خۆمانتان بۆ دەنێرین و هیوای هێز و خۆڕاگری و سەرکەوتنی بەردەوامتان بۆ دەخوازین لە خەباتە ئازایانەکەتاندا.

 باپیرانمان بەهۆی کۆمەڵکوژی و چەوسانەوەی دژە جووەوە ناچار کران کوردستان بەجێبهێڵن. لەگەڵ ئەوەش دا، ئێمە هێشتا بەشێکی دانەبڕاوی نەتەوەی کوردین و ڕەگمان لە نیشتمانی ئەبەدی کوردستان دا قووڵە. بە پەرۆشەوە چاوەڕێی ئەو ڕۆژەین کە جارێکی تر لە کوردستانێکی ئازاد و سەربەخۆدا یەکتر ببینین و باوەش بەیەک دا بکەین.

 یەهوودا بن یووسف
 سەرۆکی ڕەوەندی جوولەکە کوردەکان لە ئیسرائیل