Kerreyo pîl elametê pironêdayişî yo
Pîlanê ma vatê "Kerreyo pîl elametê pironêdayişî yo". Bi rastî gama ke merdim ro "sîyasetê ke bakurê Kurdistanî de qaşo nameyê miletê Kurd ser o yeno kerdiş" ewnîyeno dîrekt na vate yena hişê merdimî. Çimkî vateya ke tewr weş rewşa ma îzah kena na ya. Verê, gama meseleyêk bîyêne pîlanê ma derhal a mesele ser o vateyêka verînan vatêne û badê ci zî vatişî îzah kerdêne.
Mesela gama yewî xo ro karêko quwetê xo ra pîlêr bironayêne û tede israr bikerdêne, na vateyî ci rê vatêne û pey ra zî vatêne "Gama ke di merdiman şer kerd, ke înan ra yewî destê xo eşt yew kerreyo ke nêeşkeno erdî ra berz kero, bizanê ke nîyeta ey çino piro do. Çimkî ke biwaştêne do destê xo bieştêne kerreyêko ke eşkeno erdî ra hewano." Nika bakur de zî rewş ena ya. Ê sîyaset û sîyasetmedarê ke bi desan serran o tim hedefanê "sereyê ma ra zêde" danê vernîya ma û ma kerdişê çîyanê ke ma eşkenê bikerê ra zî mehrûm veradanê, yan bi rastî zî hende nezan û bêferaset ê ke pirsgirêk û ihtîyacanê nê miletî fam nêkenê yan zî nêwazenê ke miletê ma warê safîkerdişê ê pirsgirêkan de xo biresno yew noqteyî.
Gama ke pirsgirêkê to yo tewr muhîm asîmîlebîyayiş û îmhabîyayişê miletê to bo û ti warzî behsê rizgarkerdişê heme miletan/şaran yan zî Îslamîkerdişê temamê dinyayî bikerî no elametê nêwaştişê safîkerdişê meseleyî yo. Nê çîyî de armanc o yo ke enerjîya Kurdan, çîyêko taqetê înan ra zêdeyêr reyde xerc bibo ke Kurdan de semedê safîkerdişê pirsgirêko esasî hêz û taqet nêmano.
Bakurê Kurdistan de bi desan serran o gama ke mesele beno kurdîtî û heq û hiqûqê Kurdan, tayn hetî bi taybetî heq û hiqûqanê Kurdan û nirxanê kurdewarîyan sey çîyê teferuat û bêqîmet danê nîşan û erzenê yew hetî. Vanê "Gama ke ma pirsgirêkê serekî safî kerdê dima ma do nê çîyan dir zî eleqedar bibê. Nê çîyî hende girîng nîyê." Bi eno qayde nirxê ma yê serekî yê ke ma kenê Kurd, çimanê şarî ver ameyê bêqîmetkerdiş û nê nirxî roj bi roj mîyanê şarî de şenikêr û kêmêr bîyê.
Halbûkî pratîk de çîyo tewr girîng û rehet o bi ke miletê ma cuya xo bi ziwanê xo dewam bikero. Çimkî gama ke ziwanêk ganî bimano, miletê wayîrê ci bi hezaran serran zî bindest bimano rojêk gama firset bikewo destan eşkeno xayet rehet xo bindestîye ra rizgar bikero. La ke ziwanê xo vindî kero, semedê ke hestanê xo yê neteweyîyan û vîrê xo yo tarîxî zî tey vindî keno êdî ke firsetê rizgarbîyayişî bikewo destan zî nêeşkeno xo rizgar bikero.
Meseleya giring ganîmendişê hestê neteweyî û hafizayê tarîxî, yanî yê aîdîyetî yo. No zî encax bi pawitiş û averberbişê ziwanê Kurdî û nirxanê kurdewarîyan mumkin o. La sîyasîyê ke bi desan serran o bakurê Kurdistanî de îradeya miletê Kurd xesb kerdê, herinda pawitiş û averberbişê nê nirxan de seba bêqîmetkerdiş û îmhakerdişê înan xebitîyenê. Nê çîyî zî wazenê bi nameyê "biratîya şaran û biratîya umetî" meşrû biderê nîşan.
Belê, nîyeta ma esta ke ma "piro dê". Semedê aye ra zî ma destê xo erzenê kerreyo qij o ke ma eşkenê erdî ra hewanê. Yanî çîyê ke semedê ma û miletê ma girîng ê, hendê ke taqetê ma qîm keno ma kenê û şarî zî seba kerdişê înan teşwîq kenê. Yew derd û nîyetêka ma ya wina çino ke ma heme dinyayî rizgar bikerê. Çimkî ne ma eşkenê nê çîyî bikerê ne zî no çî mesûlîyetê ma yo. Seke Seîdê Kurdî zî vato "Oyo ke destê xo dergê her çîyî bikero, her çîyî ra mehrûm maneno." Gerek ti bizanî ka çi to rê lazim o û seba bidestvistişê ci çi bikerî.
Gama ke merdim pirsgirêkanê xo, çareya înan û hedê xo bizano, merdim sey hemalo belaş nêkeweno bin barê şarî û hendê hêz û taqetê xo, safîkerdişê meseleya xo dir meşxul beno. Ihtîyacê miletê ma bi rihêko newe û motîvasyonêko pêt esto. No rih û motîvasyon zî encax bi dînamîkanê cewherîyan ê nê miletî û bi ezm û îradeyêka bêhempa mumkin o virazîyo. Domanê nê miletî, temînatê ameyoxêko azad û serberz ê seba nê miletî. Ma domanê nê miletî yê..