مێتری هۆشداری دەدات لە جووڵەی ئەفسەرانی پێشووی ڕژێمی سووریا لە ناو لوبناندا

پەیامی کورد... مێتری هۆشداری دەدات لە جووڵەی ئەفسەرانی پێشووی ڕژێمی سووریا لە ناو لوبناندا

جێگری سەرۆکی حکومەتی لوبنان، تاریق مێتری، نیگەرانی خۆی دەربڕی سەبارەت بەو زانیارییانەی باس لە جووڵەی ئەفسەران و ئەندامانی ڕژێمی پێشووی سووریا دەکەن لە ناو خاکی لوبناندا. ناوبراو ئاماژەی بەوە کرد کە ئەم زانیارییانە، ئەگەر ڕاست بن، پێویستییان بە بەدواداچوونی جیددی هەیە لەلایەن دەزگا پەیوەندیدارەکانەوە.

مێتری لە پۆستێکدا لە تۆڕی کۆمەڵایەتی "ئێکس" (X) جەختی کردەوە کە دەبێت دەزگا ئەمنییەکانی لوبنان وردبینی لە ڕاست و دروستی ئەم هەواڵانەدا بکەن و ڕێوشوێنی پێویست بگرنە بەر. ڕاشیگەیاند کە ئەرکی دەوڵەتە ڕێگری بکات لە هەر چالاکییەک کە زیان بە یەکپارچەیی سووریا بگەیەنێت یان هەڕەشە لە ئاسایش و سەقامگیرییەکەی بکات، چ لە ناو لوبنانەوە بێت یان لە خاکەکەیەوە دەست پێ بکات.

مێتری داوای بەهێزکردنی هەماهەنگی لەگەڵ دەسەڵاتدارانی سووریای کرد، لەسەر بنەمای ڕێزی یەکتری بۆ سەروەری هەردوو وڵات، بە جۆرێک خزمەت بە بەرژەوەندییە هاوبەشەکان بکات و ڕێگری بکات لە بەکارهێنانی خاکی لوبنان بۆ هەر کارێکی دوژمنکاری.

ئەم هەڵوێستەی جێگری سەرۆکی حکومەتی لوبنان دوای ئەوە دێت کە کەناڵی "ئەلجەزیرە" کۆمەڵێک بەڵگەنامە و تۆماری دزەپێکراوی بڵاوکردەوە و ڕایگەیاند کە سەر بە ئەفسەرە باڵاکانی سوپای پێشووی سووریان، و تێیاندا باس لە جووڵانەوەیەک دەکرێت بە ئامانجی کردنە ئامانجی حکومەتی نوێی سووریا.

بەپێی ئەوەی لە بەڵگەنامەکاندا هاتووە، لیوا سوهەیل حەسەن، فەرماندەی پێشووی هێزە بژاردەکانی (النخبة) سوپای ڕژێمی سووریا، کاری کردووە بۆ ئامادەکردنی بارەگایەک لە ناوچەی "حەیسە" لە ناو خاکی لوبنان، لە نزیک سنووری سووریا، بۆ ئەوەی وەک ناوەندێک بۆ فەرماندەیی کردنی ئۆپەراسیۆنە سەربازییە ئەگەرییەکان دژی دیمەشق بەکاری بهێنێت.

هەروەها دزەپێکراوەکان وردەکاریی پەیوەست بە پێکهاتەی ڕێکخراوەیی گروپێکی بەسەرۆکایەتی ڕامی مەخلووف نیشان دەدەن، لەگەڵ زانیاری دەربارەی ئەو هێز و کەرەستانەی کە لە ناوەوە و دەرەوەی سووریا هەیانە. بەپێی ئەو بەروارانەی لە تۆمارەکاندا هاتوون، ئەم چالاکییانە لە نێوان مانگی نیسان و کانوونی یەکەمی ٢٠٢٥ ئەنجام دراون.