ئەنجومەنی نیشتمانیی کوردی بۆ شەیبانی: دانپێدانانی دەستووری بە گەلی کورد و مافە سیاسی و نەتەوەییەکانی

پەیامی کورد- قامیشلۆ... ئەنجومەنی نیشتمانیی کوردی بۆ شەیبانی: دانپێدانانی دەستووری بە گەلی کورد و مافە سیاسی و نەتەوەییەکانی

ئەنجومەنی نیشتمانیی کوردی لە سووریا (ئەنەکەسە) بەیاننامەیەکی سەبارەت بە سەردانی شاندێکی بۆ دیمەشق بڵاوکردەوە، تێیدا ڕایگەیاند کە ئەسعەد شەیبانی، وەزیری دەرەوەی سووریا لە دیمەشق پێشوازی لە "شاندێکی باڵای ئەنجومەنەکە بە سەرۆکایەتی محەمەد ئیسماعیل کردووە"، کە تێیدا "جەخت لەسەر دانپێدانانی دەستووری بە گەلی کورد و دەستەبەرکردنی مافە سیاسی و نەتەوەییەکانی کراوەتەوە".

بەیاننامەکەی ئەنجومەنی نیشتمانیی کوردی ئاماژەی بەوە کردووە کە ئەو دیدارەی ئەمڕۆ دووشەممە (٢ی شوباتی ٢٠٢٦) بەڕێوەچوو، "ڕەنگدانەوەی ئامادەیی سیاسیی ڕوو لە زیادبوونی ئەنجومەنەکە و ڕۆڵە سەرەکییەکەیەتی لە نوێنەرایەتیکردنی دۆزی کورد لەسەر گۆڕەپانی نیشتمانیی سووریا".

هەروەها ڕوونی کردووەتەوە کە "لە کاتی دیدارەکەدا، جەخت لەسەر پێویستیی دانپێدانانی دەستووری بە گەلی کورد وەک هاوبەشێکی ڕەسەن لە سووریادا کراوەتەوە، لەگەڵ دەستەبەرکردنی مافە نەتەوەیی، سیاسی و کولتوورییەکانی، بە شێوەیەک کە پرەنسیپی شەراکەتی نیشتمانیی ڕاستەقینە بچەسپێنێت و تایبەتمەندیی گەلی کورد لە چوارچێوەی سووریایەکی یەکگرتووی فرەیی و دیموکراسیدا بپارێزێت".

ئەنجومەنی نیشتمانیی کوردی بەیاننامەکەی بەوە کۆتایی پێهێنا کە کۆبوونەوەکە باسی لە "ڕێگاکانی کردنەوەی ڕێڕەوێکی جددی بۆ گفتوگۆی سیاسی کردووە، کە دۆزی کورد لە پێگەی دروستی خۆیدا وەک دۆزێکی نیشتمانیی دادپەروەر دابنێت کە ناکرێت لە هیچ چارەسەرێکی داهاتووی سووریادا چاوپۆشی لێ بکرێت".