جێگری وەزیری ناوخۆی تورکیا : گفتوگۆ له‌ باره‌ی پەیامی ئاشتی و حیکمەتی مەلای جزیری دەکەین

پەیامی کورد    ...  جێگری وەزیری ناوخۆی تورکیا : گفتوگۆ له‌ باره‌ی پەیامی ئاشتی و حیکمەتی مەلای جزیری دەکەین

شەممە، 29ـی تشرینی دووەمی 2025، لە میانەی چوارەمین سمپۆزیۆمی نێودەوڵەتی مەلای جزیری، مونیر قەرەئۆغلو، جێگری وەزیری ناوخۆی تورکیا ووتارێکی پێشکەش کرد.

قەرەئۆغلو لە ووتارەکەی دا ڕایگەیاند، "مەلای جەزیری کە بە درێژایی مێژوو ڕووناکی بەخشیوەتە ژیانمان، ئەمڕۆ هەموومانی لەم سمپۆزیۆمەدا کۆکردووەتەوە و بووەتە هۆی ئەوەی جەنابی سەرۆک بارزانیش لێرە ئامادە بێت."

جێگری وەزیری ناوخۆی تورکیا ووتیشی، "شانازی دەکەین، ئەمڕۆ لەم کۆڕبەندی زانست و مەعریفەیەدا لەگەڵ ئێوەین. لەم سمپۆزیۆمەدا کە میوانان لە شوێنە جیاوازەکانەوە بەشدارییان تێدا کردووە، گفتوگۆ لەسەر پەیامی ئاشتی و حیکمەتی مەلای جزیری دەکەین."

لە بەشێکی دیکەی قسەکانیدا ئاماژەی بە مێژووی ناوچەکە کرد و ووتی، "ئەمڕۆ باس لە خەزێنەیەکی مێژوویی دەکەین؛ ئێمە لە شوێنێکداین کە یادەوەریی حەزرەتی نووح (د.خ) دەهێنێتەوە یاد، ئەو پێغەمبەرەی کە لەگەڵ گەلەکەیدا لەسەر چیای جوودی لەنگەری گرت و لەوێوە جارێکی تر ژیان و مرۆڤایەتی دەستی پێکردەوە."

ڕایگەیاند، "ئەم خاکە تەنیا بە چیا و ڕووبارەکانییەوە نەناسراوە، بەڵکوو بەهۆی زانایانییەوە شوێنێکی ناوازەیە. لە دیاربەکر و ماردین و ناوچەکانی دیکەوە چرای زانست و عیرفانیان داگیرساندووە، کە بێگومان مەلای جزیری یەکێکە لە ئەڵقە هەرە بەهێزەکانی ئەو زنجیرەیە."

شەممە، 29ـی تشرینی دووەمی 2025، سەرۆک بارزانی لە شارۆچکەی جزیرێ سەر بە پارێزگای شرنەخ؛ بەشداری لە چوارەمین سیمپۆزیۆمی نێودەوڵەتی "مەلای جزیری" کرد و ووتارێکی پێشکەشی ئامادەبووان کرد.