زیادبوونی فشارە ئەمنییەکان بۆ سەر چالاکانی بواری ڕاگەیاندن بە هۆی زیاتربوونی قەیرانی بێ ئاوی لە بانە "ڕۆژهەڵات"

پەیامی کورد   ...   زیادبوونی فشارە ئەمنییەکان بۆ سەر چالاکانی بواری ڕاگەیاندن بە هۆی زیاتربوونی قەیرانی بێ ئاوی لە بانە "ڕۆژهەڵات"

لە ماوەی چەند ڕۆژی ڕابردوودا، فشاری دامەزراوە ئەمنییەکان لەسەر ڕۆژنامەنووسان و بەڕێوبەرانی پەیجە هەواڵییەکانی شاری بانە زیاد بووە و ژمارەیەک لەوان جگە لە وەرگرتنی پەیامی هەڕەشەئامێزی تەلەفۆنی، بە شێوەی ڕاستەوخۆش بانگ کراون بۆ ئەوەی خۆیان لە بڵاوکردنەوەی هەر جۆرە ڕاپۆرتێک لەسەر قەیرانی ئاو ببوێرن.

بە ووتەی سەرچاوەیەکی ئاگادار، کاربەدەستانی ئەمنی لە ڕەوتی ئەم بانگ کردنانەدا، جگە لە خستنەڕووی تۆمەتی «تێکدانی بیروڕای گشتی» ، هەڕەشەیان لە چالاکانی ڕاگەیاندن کردووە کە لە ئەگەری بەردەوامی دان بە بڵاوکردنەوەی هەواڵەکانی پەیوەندیدار بە قەیرانی ئاو، ڕووبەڕووی لێپێچینەوەی دادوەری و ئەمنی دەبنەوە، ئەمە لە کاتێک دایە کە بڕانی ئاو لە هەندێک ناوچە ٧٢ کاتژمێری تێپەڕاندووە.

ئەو سەرچاوەیە زیادی کردووە کە هێزە ئەمنییەکان بە هەڕەشە و فشار، بەنووسراوە بەڵێنیان لە بانگکراوان وەرگرتووە کە هەواڵی قەیرانی ئاو بڵاو نەکەنەوە.