کتێبخانەی مەستوورەی ئەردەڵان لە ئامەد (دیاربەکر) کرایەوە

پەیامی کورد   ...   کتێبخانەی مەستوورەی ئەردەڵان لە ئامەد (دیاربەکر) کرایەوە

لە چوارچێوەی پڕۆژەی یەک کتێبخانە بۆ هەر گەڕەکێک، شارەوانیی گەورەی ئامەد (دیاربەکر) لە کوردستانی تورکیا و شارەوانی ناوچەی رەزان، کتێبخانەی مەستوورە ئەردەڵان، یەکەمین مێژوونووس و شاعیری ناوداری کوردی شاری سنەیان کردەوە.

لەو ڕێوڕەسمەدا، سێرا بۆجاک، هاوسەرۆکی شارەوانی ئامەد، ڕایگەیاند کە درووست کردنی کتێبخانەی نوێ بەشێک لە بەرنامەی فراوان کردنی دەست ڕاگەیشتن بە سەرچاوەی پەروەردەیی یە و پێشوازی خوێندکاران و گەنجان نیشانەی پێویستی زۆر بەو ژینگەیە.

مەستوورە ئەردەڵان، شاعیر و مێژوونووسی ناوداری کورد، ساڵی ١٨٠٤ لە شاری سنە لە دایک بووە و بە هەردوو زمانی کوردی و فارسی شێعری نووسیوە. مێژووی ئەردەڵان یەکێکە لە بەرهەمەکانی ناوبراو کە بە شێوەیەكی زانستی بۆ مێژوو نووسراوە. هەروەها لە شێعرەكانی ناوبراو، نزیکەی دوو هەزار بەیت ماونەتەوە.