سیناتۆر ڤان هۆڵن: لەگەڵ ژەنەڕاڵ مەزڵووم باسی گۆڕانکارییەکانمان کرد، بەتایبەت لە شاری کۆبانێ

پەیامی کورد- قامیشلۆ... سیناتۆر ڤان هۆڵن: لەگەڵ ژەنەڕاڵ مەزڵووم باسی گۆڕانکارییەکانمان کرد، بەتایبەت لە شاری کۆبانێ

کریس ڤان هۆڵن، سیناتۆری ئەمریکی، نیگەرانیی قووڵی خۆی بەرامبەر بە پەرەسەندنەکانی ئەم دواییەی سووریا دەربڕی و جەختی کردەوە کە بەهێزکردنی سەقامگیری لە وڵاتەکەدا، دوای چەندین دەیەی ململانێ و چەوساندنەوە، بۆ گەلی سووریا و ئاسایشی ناوچەکە زۆر گرنگە.

ڤان هۆڵن لە لێدوانێکدا سەبارەت بە بارودۆخی مەیدانی و سیاسیی سووریا وتی، لە نزیکەوە چاودێری ڕووداوە خێراکان دەکات، ئاماژەی بەوەش کرد کە پەیوەندییەکی تەلەفۆنی لەگەڵ ژەنەڕاڵ مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) ئەنجامداوە، بۆ تاوتوێکردنی دوایین پێشهاتەکان، لەوانەش ئەو ڕاپۆرتانەی باس لە پێشێلکارییەکانی حکومەتی سووریا دەکەن بۆ ڕێککەوتنی ڕاگرتنی تەقەی ئەم دواییە، بەتایبەت لە شاری کۆبانێ.

ئەو سیناتۆرە ئەمریکییە ڕاشیگەیاند، کە هێزەکانی سووریای دیموکرات هاوبەشێکی نزیکی ویلایەتە یەکگرتووەکانی ئەمریکان و سەرهێزی شەڕی دژی داعشن، ئەمەش وا دەکات واشنتۆن پابەند بێت بەوەی دڵنیا بێتەوە لەوەی بە دادپەروەری مامەڵەیان لەگەڵ دەکرێت. ڤان هۆڵن داوای لە ئەمریکا کرد کە دەستبەجێ لە حکومەتی سووریا داوا بکات پابەندی ڕاگرتنی تەقە بێت و هێرش نەکاتە سەر ئەو ناوچانەی زۆرینەیان کوردن.

ڤان هۆڵن جەختی لە گرنگیی ئەوە کردەوە کە پێویستە ویلایەتە یەکگرتووەکانی ئەمریکا کار بکات بۆ گەڕاندنەوەی هەردوولا بۆ سەر مێزی گفتوگۆ پێش کۆتاییهاتنی ماوەی ڕاگرتنی تەقەی ئێستا، بە ئامانجی گەیشتن بە ڕێککەوتنێکی دادپەروەرانە کە تێکەڵکردنی تەواوەتیی هێزەکانی سووریای دیموکرات لەناو پێکهاتەی حکومەتی سووریادا مسۆگەر بکات، بەو شێوەیەی یارمەتیدەر بێت لە بەدیهێنانی سەقامگیریی هەمیشەیی لە وڵاتەکەدا.