سەرۆکی سووریا ئەحمەد شەرع پەیوەندییەکی تەلەفۆنی لەگەڵ سەرۆک مەسعوود بارزانی ئەنجام دەدات

پەیامی کورد... سەرۆکی سووریا ئەحمەد شەرع پەیوەندییەکی تەلەفۆنی لەگەڵ سەرۆک مەسعوود بارزانی ئەنجام دەدات

ئەحمەد شەرع، سەرۆکی سووریا، ئەمڕۆ هەینی،  پەیوەندییەکی تەلەفۆنی لەگەڵ سەرۆک مەسعوود بارزانی ئەنجامدا و تێیدا بارودۆخی ناوچەکەیان تاوتوێ کرد.

تۆڕی میدیایی "ڕووداو" بڵاویکردەوە، هەردوولا باسیان لە "دوایین پێشهاتە سیاسییەکانی سووریا و ئەو گۆڕانکارییانەی لە ناوچەکەدا ڕوودەدەن" کردووە.

ئاماژەی بەوەش کرد، هەردوولا جەختیان لەسەر "گرنگیی سەقامگیری و هەماهەنگیی هاوبەش" کردووەتەوە.

هەواڵەکە ئاماژەی بەوەش کردووە کە "شەرع جەختی کردووەتەوە کە کورد پێکهاتەیەکی ڕەسەن و سەرەکیی گەلی سووریایە"، هەروەها جەختی لەسەر "پاپەندبوونی تەواوی دەوڵەتی سووریا بە دەستەبەرکردنی هەموو مافە نەتەوەیی، سیاسی و مەدەنییەکانی کورد و پێکهاتەکانی دیکەی سووریا بە یەکسانی و بەبێ جیاکاری" کردووەتەوە.

لەلایەن خۆیەوە، "سەرۆک بارزانی ستایشی ڕوانگەکەی شەرعی کرد" و "پاڵپشتیی خۆی بۆ ئیرادە و خواستەکانی سوورییەکان لە بونیادنانی دەوڵەتێکی گشتگیر کە هەموو لایەن و پێکهاتەکان لەخۆبگرێت و هەمووان تێیدا هاوبەش بن" دەربڕی.

سەرۆک بارزانی جەختی لەسەر "پێویستیی بەردەوامبوونی ڕاوێژ و هەماهەنگی کردەوە بە جۆرێک کە خزمەت بە بەرژەوەندیی هەموو لایەنەکان و پاراستنی ئاشتیی کۆمەڵایەتی بکات".