ناوەڕۆکی پڕۆژەی ئاگاداركردنەوەی لافاو لە هەولێر دەخرێتەڕوو

پەیامی کورد    ...   ناوەڕۆکی پڕۆژەی ئاگاداركردنەوەی لافاو لە هەولێر دەخرێتەڕوو

لە پارێزگای هەولێر کۆبوونەوەیەکى تایبەت بە پڕۆژەی درووست کردنی سیستەمی ئاگاداركردنەوەی لافاو لە هەولێر و دەورووبەری ئەنجام درا، لیژنەیەکیش بۆ پێداچوونەوە و ووردبینی بۆ پڕۆژەکە پێکهێندرا، بە درووستكردنی ئەو پڕۆژەیە، هەولێر دەبێتە یەكەمین شار لەسەر ئاستی كوردستان و عێراق کە خاوەنی ئەو سیستەمە بێت.

ئومێد خۆشناو، پارێزگارى هەولێر ڕایگەیاند، بە پاڵپشتی ڕاستەوخۆی مەسروور بارزانی، سەرۆكوەزیرانی هەرێمی كوردستان، بە گرتنەبەری ڕێکار و ڕێوشوێنەکانی ساڵانی ڕابردوو، ئەنجامدانی چەندین پڕۆژە و چارەسەركردنی ئەو خاڵە لاوازانەی دەبوونە هۆی درووست بوونی لافاو و پەنگخواردنەوەى ئاوی زیادە، توانرا تاڕادەیەكی زۆر، مەترسی درووست بوونی لافاو لەسەر شاری هەولێر و دەورووبەری نەهێڵدرێت، ئەمساڵ دەرەنجامەكانی بینرا.

لە کۆبوونەوەکە بابەتێک لەبارەی پڕۆژەکە لەلایەن بەڕێوبەرایەتی ئاودێری هەولێر پێشكەش كرا. بەشێوەیەكی زانستی ئامانج و چۆنیەتی دانان، كاركردنی سیستەمەكە و ئاگاداربوون لە ڕوودانی لافاو شی کرایەوە. بە درووست كردنی ئەو پڕۆژەیە، هەولێر دەبێتە یەكەمین شار لەسەر ئاستی كوردستان و عێراق کە خاوەنی ئەو سیستەمە بێت، بۆیە گفتوگۆ لە بارەی سیستەمەكە بەشێوەیەكی گشتی كرا.

ئامانجی پڕۆژەکە، ئاگاداركردنەوەی لایەنی پەیوەندیدار و هاووڵاتییانە، لە ڕوودانی هەر ئەگەرێكی نەخوازراو و لافاو بە هۆی گۆڕانی كەشوهەواو و باران بارینی زۆرەوە، هەروەها بەهۆی ئەو سیستەمەوە دەتوانرێت لەڕێگەی درووست كردنی ئەپڵیكیشنی تایبەت و، ڕێنمایی پێویست بە هاووڵاتییان بدرێت. 

هاوکات کارەكانی ئەم پڕۆژەیە، بریتی دەبێت لە چۆنیەتی مامەڵەکردن لەگەڵ لافاو و گرتنەبەری هەموو ڕێکارێکی پێویست بۆ پاراستنی گیانی هاووڵاتیان، دیاری کردنی مەترسی ناوچەکان و پلەبەندیان بۆ بکات و دیاری بکرێت، تێیدا زانیاری تەواو و درووستی کەشناسی بۆ هەر ڕووداو و ئەگەرێک بخاتە ڕوو.