نێچیرڤان بارزانى : پارتى بێ جیاوازى ماڵى هه‌مووانه
پەیامی کورد ... نێچیرڤان بارزانى : پارتى بێ جیاوازى ماڵى هه‌مووانه
سێشه‌ممه 2025/11/4 نێچیرڤان بارزانى، به‌شدارى له ڕێوڕه‌سمى بانگه‌شه‌ى جه‌ماوه‌ری پارتی دا كرد كه له دهۆك به ئاماده‌بوونى مه‌سروور بارزانى و به‌رپرسانى باڵاى پارتى و جه‌ماوه‌رێكى زۆرى بادینان به‌ڕێوه‌چوو.
له ووته‌یه‌كدا نێچیرڤان بارزانى، وێڕاى ئاماژه‌دان به مێژوو و ڕۆڵ و پێگه‌ى بادینان، تیشكى خسته سه‌ر گرینگی پشتگیری بادینان له پارتى بۆ به‌ده‌ستهێنانى یه‌ك ملیۆن ده‌نگ و زیاتریش له هه‌ڵبژاردنى ئه‌نجوومه‌نى نوێنه‌رانى عێراق دا، هه‌روه‌ها دووپاتى كرده‌وه كه به‌هێزبوونى پارتى له به‌غدا به‌هێزبوونى كوردستانه.
ئه‌مه ده‌قه‌كه‌یه‌تى:
جه‌ماوه‌رێ هێژا و خۆشتڤى،
خه‌لكێ دهۆكا ڕه‌نگین و
به‌هدینا یا خه‌ملا كوردستانێ،
زاخۆ، ئامێدى، ئاكرێ،
خه‌لكێ مه یێ دلسۆز ل شێخان،
به‌رده‌ڕه‌ش، سێمێلێ و
هه‌مى ده‌ڤه‌رێت وان،
مالباتێت سه‌ربلندێت شه‌هیدا،
خه‌باتگێر و پێشمه‌رگێت قه‌هره‌مان،
دایك و خوشكێت دلۆڤان،
گه‌نجێت مه یێت خۆڕاگر و چه‌له‌نگ،
هوین ل هه‌ر جهه‌كێ به‌هدینا بن،
ئێڤارا وە باش و ب خێر بێن سەرچاڤا،
دەستپێكرنا ئاخاڤتنێت خۆ، سلاڤ و ڕێز و خۆشەویستییا جه‌نابێ سه‌رۆك بارزانى بۆ هه‌وه هه‌میا. سلاڤ و ڕێز و ڤیان ژ نیڤا دلێ من و برایێ من كاك مەسروور، بۆ هه‌وه هه‌میا.
گه‌له‌ك دلخۆشم كو ڤێ ئێڤارێ ئه‌ز ڤێ گه‌رموگوڕیێ و ڤێ جۆش و حه‌ماسێ ل هه‌وه دبینم. چەند شانازیەکا مەزنه مرۆڤ د حزبەکێدا بیت ئەڤ هەمی دڵسۆز و وەفادارە هەبن.
بەلێ، ئه‌ڤه‌یه به‌هدینا، ئه‌ڤه‌یه پارتى، ئه‌ڤه‌یه چیایێ بلند یێ هه‌رگاڤ ل پشت پارتى. هوین هه‌ر بژین، هوین هه‌ر هه‌بن بۆ پارتی.
به‌هدینا و پارتى یەک دلن، یەک گیانن، یەک دەنگن و من هیچ گومانەک نینە ڕۆژا 11/11 ئەم هەمی داستانەکا دی یا سەرکەفتنێ بۆ کورد و کوردستانێ، بۆ پارتى دیموكراتی كوردستان ب پشتەڤانییا هەوە ب ئانه‌هه‌ییا خودێ دێ تۆمار کەین.
جه‌ماوه‌ر و خه‌لكێ مه یێ هێژا و خۆشتڤی:
ئه‌ز هه‌وه دبینم، ئەز ڤێ جۆش و خرۆشێ دبینم، ئێدى پشتڕاستم كو وه‌كى هه‌رجار د دیرۆكێدا و ب پشته‌ڤانییا خودێ و پستەڤانییا هەوە، سه‌ركه‌فتن هه‌ر بۆ پارتییه. ئه‌ز هه‌وه دبینم، ئێدى پشتڕاستم كو ملیۆنه‌كا ده‌نگا و زێده‌تر، دێ مسۆگەر بیت بۆ پارتی دیموكراتی كوردستان.
من دڤێت ئەز ڤێ پرسیارێ ل وە بكەم:
هوین چ دبێژن؟
ب ئێك دەنگ..
خوشك و برایێت هێژا،
به‌هدینا وارێ خه‌بات و تێكۆشینێیە، به‌رخودان، قوربانیدان و قه‌هره‌مانیێیه. كیش ماڵا به‌هدینا هەیە چیرۆكه‌كا پێشمه‌رگاتیێ، یا تێكۆشه‌ره‌كى تێدا نه‌بیت كو چه‌كێ به‌ڕه‌ڤانیێ و پاراستنا كوردستانێ نه‌هاڤێتبیته ملێ خۆ.
كیش مالا به‌هدینا هەیە كو دایكه‌كا دلۆڤان تێدا نه‌بیت، سه‌بره‌كا درێژ نه‌كێشا بیت داكو ڕۆژه‌كێ كوڕێ وێ یێ خه‌باتكار، یێ پێشمه‌رگه، سه‌ربلند و سهرفراز ڤه‌گه‌ڕیته‌ڤ سه‌ر ئاخا خۆ یا ئازاد.
ب هزاران گه‌نجێت به‌هدینا دلێ وان تژى خه‌ون و هیڤى بووینە كو ڕۆژه‌كێ تێدا وه‌لاتێ خۆ ئازاد و ئارام و سهرفراز ببینن. ژیان و پاشه‌ڕۆژا خۆ تێدا ئاڤا بكه‌ن، خه‌ونێت خۆ تێدا بكه‌نه ڕاستى و وه‌كى خه‌لكێ دنیایێ، سه‌ردارێ وه‌لاتێ خۆ بن.
لڤێرێ، لسه‌ر ئاخا به‌رخودان و ئازادیێ. سه‌رێ خۆ لبه‌ر گیانێ پاقژێ شه‌هیدا دچه‌مینین. ڕێز و سلاڤا بۆ مالبات و كه‌سوكارێت وان یێت سه‌ربلند دهنێرین. سلاڤ ل هه‌ر كه‌سێ كو خه‌بات كرى داكو ئالا كوردستانێ لسه‌ر چایێت به‌هدینا و كوردستانێ هه‌ر و هه‌ر یێ بلند بیت، ژ ڤێرێ ئەم سلاڤا بۆ وان هەمیا دهنێرین.
خه‌لكێ خۆشتڤى یێ به‌هدینا،
دیرۆکا پارتی و ڤێ دەڤەرێ ژێک ناهێتە جوداکرن. یەکەمین لقا پارتی ل ڤێ دەڤەرێ بوویە. یەکەمین داستانا شۆڕەشا ئەیلوولێ ل ڤێ دەڤەرێ بوویە. داستانا زاویتە، ب فه‌رمانده‌هییا ڕاستەوخۆیا بارزانیێ نەمر و ب خوینا باب و باپیرێت وە هاتیە تۆمارکرن.
یەکەمین مەفرەزەیا شۆرەشا گولانێ ژی دیسا ل ڤێ دەڤەرێ بوویە. كه‌س نه‌شێت به‌حسێ دیرۆكا ملله‌تێ مه و قوربانى یێت گه‌لێ كوردستانێ بكه‌ت، ئه‌گه‌ر به‌حسى قه‌هره‌مانى و دلسۆزى و خه‌باتا به‌هدینا نه‌كه‌ت. ئه‌ڤرۆ ژى ئه‌م نه‌شێین كوردستانێ بپارێزین، ئه‌گه‌ر پشته‌ڤانى و دلسۆزییا هه‌وه نه‌بیت بۆ پارتى، بۆ ڕێبازا بارزانى.
هه‌وه خه‌لكێ وه‌لاتپارێزێ به‌هدینا، به‌رى هه‌ر كه‌سه‌كى یێ ئیسبات كرى كو سه‌ركه‌فتنا پارتى، سه‌ركه‌فتنا كوردستانێیه. كلیلا سه‌ركه‌فتنا پارتى ژى به‌هدینانە. به‌هدینا سڕا سه‌ركه‌فتنا پارتى یه و دێ سڕا سه‌ركه‌فتنا پارتی مینیت.
11ى ڤێ هه‌یڤێ ژى دیسا به‌هدینا دێ سه‌ركێشا سه‌ركه‌فتنا پارتى بیت. دێ سه‌ركێشا ملیۆنه‌كا ده‌نگا و زێده‌تر بیت بۆ لیسا 275 یا پارتى دیموكراتى كوردستان.
جه‌ماوه‌رێ هێژا،
خه‌لكێ مه یێ خۆشتڤى ل به‌هدینا،
مه گه‌له‌ك جارا گۆتیه. به‌لێ دیسا دێ دوباره كه‌ین:
ئه‌ڤ هه‌لبژارتنه بۆچى بۆ كوردستانێ دگرنگن؟
بۆچى گرنگه پارتى سه‌ركه‌ڤیت؟
بۆچی گرنگە پارتی ملیۆنه‌ك و زێده‌تر ژى ده‌نگا بینیت؟
ببیته حزبا ئێكێ ل هەمی عێراقێ؟
سالا 2005ێ مه ژى ل كوردستانێ دگه‌ل خه‌لكێ عێراقێ، ده‌ستوورێ عێراقێ په‌سه‌ند كر. مه گۆت: عێراقه‌كا نوى دێ چێ بیت كو وه‌لاتێ مه هه‌میا بیت. به‌لێ ئه‌ڤه بیست سال چوون. ده‌ستوور نه‌هاته بجهئینان. شه‌ڕ و نه ئارامى و مالوێرانى بسه‌ر عێراقێدا هاتن. مافێت ده‌ستوورى یێت خه‌لكێ كوردستانێ هاتنه بنپێكرن. فیدراڵى هاتە ئیهمالكرن، مە گۆت ئەڤ قۆناغەكا ئینتقالییە، بەلێ ئەو قۆناغ ژی دەرباس بوو و نهۆ عێراق ئارام بوویە.
ئێدی وەختە و پارتى ڤێ جارێ ل به‌غدا دێ هه‌وڵ ده‌ت، دێ كار كه‌ت بۆ بجهئینانا ده‌ستوورى و سیستمێ فیدرالی. له‌وما پارتى دڤێت بهێز و شیانه‌كا مه‌زنتر ل به‌غدا بیت، وه‌كى هه‌رجار، هوین هێز و شیانا مه‌زن یێت پارتییا دیموكراتا كوردستانێنە. هوین دێ وه‌كه‌ن كو كاندیدێت پارتى دگه‌ل یه‌ك ملیۆن ده‌نگا و زێده‌تر ژى بچنه به‌غدا. چونكى گه‌ره‌نتییا بده‌ستڤه‌ئینان و پاراستنا مافێت كوردستانێ، پارتییە دشێت وێ بكەت.
پارتی ژ ڕۆژا كو لسەر دەستێ بارزانیێ نەمر هاتییە دامەزراندن و هه‌تا ئەڤرۆ، ئێك ئارمانجا مەزن ھەبوویە: ئەو ژی گەلێ كوردستانێ بوو، ھوین بوون. هوین ئارمانجا سەركردێ مەزن سەرۆك بارزانیێ نەمر بوون. ھوین ل وەلاتێ خۆ ئازاد و سەرفەراز بژین، ئەڤە بوو داخوازیا وی. خۆ بۆ كەسێ نەچەمینن و زۆرداریێ ژی ل كەسێ نەكەن.
پارتی پێویستە ب سەنگ بچتە بەغدا، ئانكو كوردستان و دەنگێ ھەوە دێ ب سەنگ چیتە بەغدا. ئەڤە ژی دێ چەوا بیت؟ دێ سۆزا مە بیت بۆ ڕۆژا 11/11 دەنگێت مە دێ تژی سندوقێت دەنگدانێ بن و دەنگێ خۆ دێ دەینە لیستا 275 یا پارتی دیموكراتی كوردستان.
خوشك و برایێن ھێژا،
جه‌ماوه‌رێ خۆشتڤى یێ دهۆكێ و به‌هدینا،
كانێ چاوا كوردستان مالا ھەمیانە. پارتی ژی بێ جداهى مالا مە ھەمیانە. چادرا پارتی ھندا بەرفره‌هـ و بلندە، جهێ ھەمیا دبندا دبیت. پارتی مالا ھەمی نەتەوە و ئایینانە. پارتی مالا موسلمانایە، ئێزدییایە، مەسیحیایە، كاكەیییایە. مالا كورد و كلد ـ ئاشوور ـ سریان و ئەرمەنانە، مالا توركمه‌ن و عەرەبانە. مالا ھەر كەسەكێ ستەمدیتییه.
بارزانیێ مەزن ئەم فێركرینە كو خزمەتكارێت خەلكێ خۆ بین. سەرۆك بارزانی ژی ئەم فێركرینە گەلەك شۆل كەین و كێم باخڤین. پارتی بۆ خزمەتا خەلكی ھاتیە دامەزراندن و ئەوێ پارتی بیت، خزمەتكارە.
چونكی ئارمانجا مە خزمەتا خەلكێ مە و وەلاتێ مەیە، مە وەختێ بەرسڤدانا نەحەز و نەیارا نینە. مە نەڤێت خۆ بینینه وێ ئاستێ. مە دڤێت كار و ئاڤەدانییا كوردستانێ بەرسڤا مە بیت بۆ نەحەزێت پارتی. ئەم به‌رسڤا کەس نادەین، چونکى خەلکێ كوردستانێ حەقیقەتا پارتی و یا وان دبینیت. بلا ئەو باخڤن و ئەم ژی دێ خزمەتا ھەوە كەین و دێ وەلاتی خۆ ئاڤا كەین. مەزن دبێژن: سەد گۆتن گۆری كریارەكێ بن.
هه‌ر ژ ڕۆژا كو پارتى بوویه ده‌سه‌لات و حوكمڕانیا كوردستانێ وه‌رگرتى، به‌رده‌وام خزمه‌ت و ئاڤه‌دانى یا كرى، ئارامى یا ئیناى. حكوومه‌تا هه‌رێما كوردستانێ ب سه‌ركردایه‌تییا پارتى هه‌ر ژ ڕۆژا ئێكێ و هه‌تا ئه‌ڤرۆ كاروانه‌كێ درێژ یێ خزمه‌ت و ئاڤه‌دانیێ یێ بڕێكرى. نۆكه ژى ئه‌ڤ كاروانه یێ به‌رده‌وامه و ب پشته‌ڤانیا هه‌وه هه‌ر دێ یێ به‌رده‌وام بیت و ب ئانه‌هییا خودێ دێ گەهینە وان ئارمانجا ئەوێت كو هەوە خەبات بۆ كری و خزمەت بۆ كری و پێڤە ماندی بووی.
دەلیڤێ بدەن دەستخۆشییەكا گەرم ل برایێ خۆ یێ هێژا كاك مەسروور بارزانی بكەم، وەكی سەرۆك وەزیرێ حكوومەتا هەرێما كوردستانێ، سەرۆك وەزیرێ مە كو سه‌ربارى هه‌مى زه‌حمه‌تى و هەمی ئاسته‌نگی یێت كو بۆ هاتییە چێكرن و تێنە چێكرن، كاروانێ خزمەتا كوردستانێ یێ بەردەوام بوویە و ئەم ئەڤرۆ دبینین ڕۆژ ب ڕۆژ، هەر ڕۆژ جارەكێ هندەك پڕۆژا ڤەدكەت و بەرێ بنیاتێ هندەك پرۆژا دادنێت.
ئەڤەیە پارتی، ئەڤەیە خزمەتكارێ پارتی و چەپلەكا گەرم بۆ سەرۆك وەزیران. ل هه‌مى جها و د هه‌مى وارادا پرۆژه تەمام كرینە و ئه‌نجام ددەت. ھندی پارتی ھەیە، كار و خزمه‌ت و پرۆژە ژی دێ هەر بەردەوام بن. پارتی پێناسا ئاڤەدانكرنێ و باوەرنامەیا ئاڤەدانكرنا كوردستانێ و ئێمناهییا كوردستانێ یا ژ گەلێ كوردستانێ، یا ژ وە وەرگرتی و دێ بەردەوام بیت وەكی خزمەتكارێ وە.
جه‌ماوه‌رێ خۆشتڤى،
خه‌لكێ هێژایێ به‌هدینان،
گه‌له‌ك زه‌خت ل كوردستانێ هاته‌كرن داكو ھەوە و پارتی بچەمینن. لێ ب ھێزا ھەوە، ب هێز و پشتەڤانییا هەوە، پارتی چیایە و ناچەمیت. فەرمانبەرێ مە دەواما خۆ نه‌هێلا و خزمەتا خەلكێ خۆ كر. مامۆستایێت مە، بەردەوامی دا دەوامێ و دەرگەھێت قوتابخانه و زانكۆیا ئێك ڕۆژ ژی نەھاتە گرتن.
پێشمەرگە و ھێزێت مە یێت ئێمناھیێ، ژ بەرێ ڕژدتر و گه‌رمتر ئه‌ركێ خۆ بجهئینان. ئه‌ڤه جهێ پێزانین و سپاسى و ده‌ستخۆشیێیه و دلگەرمیەكە بۆ مە وەكی پارتی هەتا مە ئەڤ جەماوەرە هەبیت، هێز نییە بشێت پارتی ل مەیدانێ دەربێخیت.
ئه‌ڤ دلسۆزییه چ جارا ناهێته ژبیركرن. ئه‌ڤه ئیرادا كوردستانییانە بەرانبەر زۆرداری و زێدەگاڤیێ. ئەڤە به‌ڵگه‌یه بۆ دۆست و نه‌یارا كو ئەو گەلێ خۆ لبەر ئەنفالا و كیمیابارانێ و كۆمكوژیا گرتی، دێ خۆ لبەر هه‌مى زه‌ختێت وان ژی گریت. لەوما دێ بێژم: هوین هه‌بن، یێ ئەڤ خەلكێ خۆڕاگر ھەبیت، قەت ناشكێت.
بۆ مە یا غەریب نییە کو ئەوێت ژ هێز و باوەریا پارتی دترسن، تەنگاڤ ببن کو دبینن پارتی ب پشتەڤانییا هه‌وه ڕۆژ بۆ ڕۆژێ یا مەزنتر دبیت و باوەربوون ب پارتی یا زێدە دبیت و پێگەهێ وێ یێ ناڤخۆیی و یێ هه‌رێمى و یێ نێڤده‌وله‌تى ڕۆژ بۆ ڕۆژێ یێ بهێزتر دبیت.
جەماوەرێ خۆشتڤیێ كوردستانێ،
دڤێت ئەم چ جارا ئەوان قەھرەمانا ژبیر نەكەین ئەوێت ب خوینا خۆ دارا ئازادیێ و سەرفەرازیێ ئاڤدای و ئەم گەھاندینە ئەڤرۆ. ھەروەسا كه‌دا پێشمەرگا و خەمێت خەلكێ كوردستانێ ژبیر نەكەین كو ئەوان، شەڤێت ڕەش كرنە ئەڤرۆیا ڕۆن و گەش.
گەنجێت ده‌لال یێت به‌هدینا و كوردستانێ، دوھی ل چیای پێشمەرگە بوون، به‌ڕه‌ڤانى ل ئاخا خۆ دكرن، ئەڤرۆ زەند و باسكێت خۆ ھه‌لداینە، وەلاتێ خوە ئاڤا دكەن. گەنج سامانێ كوردستانێنە. ئەز ئەڤێ ب باوەری دبێژم: ھەر وەختێ دەلیڤە بۆ گەنجێت كوردستانێ پەیدا بووی، شیاینە لسەر ئاستێ جیهانێ جهێ خۆ بكەن و ئالا كوردستانێ ل دەھان جڤات و جهان ھلداینە. به‌رده‌وام ئەز پاشه‌ڕۆژه‌كا گه‌ش د چاڤێت گه‌نجێت كوردستانێدا دبینم.
پاشەڕۆژ بۆ گەنجێت مەیە و ھیڤیدارم ـ ھیڤیدارم گوھێ خۆ نەدەنە هنده‌ك دەنگێت كو تۆڤێ بێئومێدیێ د ناڤ وەدا دچینن. گوھێ خۆ نەدەنە وان دەنگا كو ئەڤینا گەل و وەلاتی، ددلێ هەوەدا سار دكەن. پارتی ب خەباتا باب و باپیرێت هەوە 79 سالە ئەڤ ئالایە هەلكری و ئەڤ ئالایە یێ د دەستێ هەوە گەنجادا دا پارتی بەرەڤ قۆناغەكا گەشتر و مەزنتر ببەن.
هیڤیدارم ئەڤ هەلبژارتنە بۆ وان گەنجا ئەزموون بیت و بلا گەنجێت مە ب گیانێ پێشمەرگاتیێ بچنە سەر سندۆقێت دەنگدانێ و دەنگی بدەنە نوێنەرێت خۆ، نوێنەر و خزمەتكارێت خۆ ژ لیستا 275 یا پارتی دیموكراتی كوردستان.
خوشك و برایێت ھێژا،
كچ و ژنێت كوردستانێ، به‌شه‌كێ گه‌له‌ك گرنگ یێ جڤاكا مه یا مه‌ده‌نینه. د هه‌مى وارێت ژیانێدا ب دلسۆزى و داهێنه‌رى، خزمه‌تێ دكه‌ن. ئافرەت وێنه‌یه‌كێ جوان یێ پێشكه‌فتنا كوردستانێنه. ستوینێت مال و خێزانێ و جڤاكێنه. بێی وان، نە خێزان ھەیە، نە مال، نه جڤاكەكا پێشكه‌فتى.
هه‌روه‌سا ڕۆلێ مه‌زنێ مامۆستا و سەیدایێت دینى، بۆ پاراستنا بەھایێت جڤاكا مە و ڕاگرتنا ئاشتییا جڤاكی، جهێ ڕێز و پێزانینێیه. پشتەڤانێت پێكڤەژیانێ و ئێكودوقەبوولكرنێنه. دین ڕێكا بەختەوەرییا مرۆڤانه. دین ھند ل نك مه یێ پیرۆزه، پێدڤییە بلند و پاك بهێتە ڕاگرتن و قەت بۆ بەرژەوەندیا، ئان بۆ سیاسەتێ نابیت بكار بهێت.
جه‌ماوه‌رێ هێژا
خوشك و برایێت خۆشتڤى،
سیاسەتا پارتی و سەرۆک بارزانی یا حەکیمانە، خۆڕاگریا هه‌وە و سەبر و بێهنفرەهیا هه‌وە، جهێ ڕێزگرتنەكا زۆر یا مەزنە ل هەمی جیهانێ. هەر ئەڤەیە ژی بوویە ئه‌گه‌رێ سەرکەفتنا دیبلۆماسیەتا هەرێما کوردستانێ.
پارتى و ڕێبازا بارزانیێ نەمر دێ به‌رده‌وام بن. ئه‌م مللەتەکێ خۆڕاگرین، خودان دۆزه‌كا ڕەواینه، هەر ئەڤەیە ژی هێزێ ددەتە پارتى و پارتى دكه‌ته خودانا دۆزا كوردستانێ ل هەر جهەكێ بیت. د بن سیبەرا پارتیدا خەلک هەست ب ئێمناهیێ دکەت، هه‌ست ب ئستقرارێ دکەت.
مه دڤێت دگه‌ل به‌غدا هه‌مى كێشه و ئاریشێت خۆ، ئاشتییانه، ب دیالۆگ و لێكتێگه‌هشتنێ، ب ڕێكا بجهئینانا ده‌ستوورى و سیستمێ فیدرالى، چاره‌سه‌ر بكه‌ین. مه دڤێت پارتى بهێز ل به‌غدا بیت، چونكى پارتى دشێت ل وێرێ هه‌ڤسه‌نگیێ بپارێزیت. دشێت ببیته پارێزه‌را به‌رژه‌وه‌ندى یێت كوردستانییا و یێت عێراقییا بگشتى.
دشێت پارێزه‌را هه‌مى پێكهاتا بیت: چ موسڵمان، چ مه‌سیحى. چ ئێزدى و چ كاكه‌یى، چ سابیئه، یان هه‌ر بیروباوه‌ر بیت. چ كورد، چ عه‌ره‌ب. توركمان، كلدوئاشوور ـ سریان، شه‌به‌ك، ئه‌رمه‌ن، یان هه‌ر نه‌ته‌وه‌ك بیت. تو هه‌ر چ بى، هوین هه‌ر چ بن، پارتی دێ بەردەوام بیت ژ پاراستنا هه‌وه. پشتا پارتی بگرن، دا پارتی بشێت خزمەتا هه‌وه بکەت، دا مافێت هه‌وه دپاراستی بن.
كو پارتى یا بهێز بیت، ئێكڕێزى، ئێده‌نگى، پێكڤه‌كاركرن، هه‌ڤكارى و ته‌بایى دێ یا بهێز بیت. وه‌ختێ ئه‌ڤه هەبوون، پارتى و كوردستان و هێز و لایه‌نێت كوردستانى ل به‌غدا، دێ باشتر شێن مافێت ده‌ستوورى یێت كوردستانێ و هه‌مى كوردستانییا ب هه‌مى پێكهاتێت خۆڤه، بده‌ستڤه بینن، بپارێزن.
خۆشتەڤینە،
كلیلا ڤێ هه‌میێ ژى، كۆدا ڤێ هه‌میێ ژى یا د ده‌ستێ هه‌وه‌دا. یا د دەستێ هه‌وه یێت دلسۆزدا. وەختێ ئەم ڤێ جۆش و خرۆشا هەوە دبینین، ئەم پشتڕاستین كو هوین ژى ته‌خسیرێ ناكه‌ن. ڕۆژا 11ى هه‌یڤێ دێ ده‌ستێ پارتى بهێز كه‌ن. دێ پارتى ب ملیۆنه‌ك و زێدەتر یا ده‌نگا هنێرنه به‌غدا، دا كوردستان یا بهێز بیت و زێدەتر بهێز بمینیت.
ژبه‌ر ڤێ هندێ سۆزا مه هه‌میا چیه؟
ب ئێك دەنگ ببێژن: لیستا 275 یا پارتی دیموكراتی كوردستان.
خوشك و برایێن ھێژا،
داكو كوردستان بهێز بمینت، پێدڤییە پارتی بهێز بچتە بەغدا، چونكی ئه‌و هێزه یاكو دشێت كارێت مه‌زن بكه‌ت. حساباتێت مه‌زن بۆ پارتى تێنە كرن. من ئێك داخواز ژ ھەوە خوشك و برا و جه‌ماوه‌رێ پارتى و خه‌لكێ به‌هدینا و كوردستانێ ھەیە: ڕۆژا دەنگدانێ، بیننە هزرا خۆ، هزرا خۆ بكەن و ئێك پرسیار بكەن:
كێ خەبات كریە؟ كێ شەھید داینە و كێ ئەم گەھاندینە ئەڤێ ئازادی و ئاڤەدانیێ و ئارامیێ؟ كێ ئەڤ كارە كرینە؟ كی دشێت بەردەوامیێ بدەتە ئاڤەدانیێ و ئەڤان دەستكەفتا بپارێزیت؟ كی دێ شێت پاشەڕۆژا كوردستانێ مسۆگەر بكەت؟ كییە خۆ بۆ دوژمنا نەچەماندییە و خۆ بۆ دوژمنا ناچەمینیت؟
دەنگێ خۆ بده‌نە وێ لیستا كو بشێت تە و وەلاتێ تە بپارێزیت. ئەو ژی لیستا پارتا دیموكراتا كوردستانێیە. پارێزەرا ماف و دەستكەفتێت هەرێما كوردستانێ یە.
هەڤالێت هێژا ژبیر نه‌كه‌ن، ئێك ده‌نگ ژی ل ڤێ دەڤەرێ، ل بەهدینا بۆ مە زۆرە. پێویستە شەرتێ مە و شەرتێ وە ئەڤە بیت ئێك دەنگ ژی ژ دەستێ مە نەچیت. دڤێت ڕۆژا ده‌نگدانێ كه‌س نه‌هێلن، هەمی ڤێكڕا بچینە سەر سندۆقێت دەنگدانێ و بەره‌ڤ دەنگدانێ بۆ لیستا 275 یا پارتیا دیموكراتا كوردستانێ.
بێگومان ئەڤ جۆش و خرۆشا هەوە، ئەڤ ئامادەبوونا هه‌وە یا ئەڤرۆ، دلێ مە گەرم كر. دلێ مە گەرم كر كو بێگومان ئەم یێت بەرەڤ وێ ڕێكی دچین. ئەم یێت بەرەڤ وێ سەركەفتنێ دچین، سۆزا مە و هەوە ڕۆژا 11/11ـه.
ب خێر و خۆشی و سەلامەتی بۆ كوردستانێ ب ئانه‌هییا خودێ.
لڤێرە من ئاخافتنێت خۆ كرن، ئەز داخوازێ ژ برایێ خۆ یێ خۆشتڤی، سەرۆكێ حكوومەتا هەرێما كوردستانێ دكەم ئەگەر ئەو ژی تەشریفێ بینیت و پەیڤەك هەبیت بلا كەرەم بكەت و ئەو ژی پێشكەشی وە بكەت.
هون هەمی بخێر بێن سەر چاڤا و سەر سەرا..
ئەم بابەتە 7 جار خوێندراوەتەوە
