Netanyahû û Trump li ser Îran û Xezeyê şêwirîn
PeyamaKurd – Li gorî malpera nûçeyan a Îsraîlê, Ynetê, Serokwezîrê Îsraîlê Benjamin Netanyahû û Serokê Amerîkayê Donald Trump bi telefonê li ser danûstandinên nukleerî yên bi Îranê re û şerê li Xezeyê axivîn. Netanyahû îdia kir ku Îran “Amerîka û cîhanê dixapîne” û tenê ji demê kar dike, di heman demê de Trump daxwaz kir ku şerê Xezeyê bi dawî bibe, rehîne werin berdan û agirbestek mayînde pêk were. Rêveberê Mossadê David Barnea, Wezîrê Karûbarên Stratejîk Ron Dermer û Nûnerê Taybet ê Amerîkayê Steve Witkoff dê berî gera 6an a danûstandinên bi Îranê re bicivin da ku pêşketinên dawî binirxînin.
Ajansa nûçeyan a Îranê Tesnîmê jî ragihand ku Îran îro bersiveke nivîskî ji bo pêşniyara Amerîkayê ya li ser peymana nukleerî dê bişîne, ku tê de berdewamiya dewlemendkirina ûranyûmê li Îranê û çareserkirina fikarên Amerîkayê li hember rakirina dorpêçan heye.
Li gorî Ajansa Times of Israelê, Netanyahû tekez kir ku divê gefên leşkerî yên pêbawer li ser Îranê werin domandin, lê Trump diyar kir ku heta danûstandin bi temamî têk neçin, êrîşek leşkerî çênabe. Trump zelal nekir ka Amerîka dê piştgiriyê bide êrîşeke serbixwe ya Îsraîlê li dijî Îranê, an jî dê tev li êrîşekê bibe, û got ku derî ji bo diplomasiyê hîn vekirî ye.
Televîzyona Kanal 12ê ya Îsraîlê jî ragihand ku Trump ji Netanyahû xwestiye şerê Xezeyê ne tenê bi agirbestek demkî, lê bi dawîkirina şer bi temamî biqede. Ev daxwaz di çarçoveyekê de ye ku Trump hewl dide têkiliyên bi welatên Ereb re xurt bike û Îranê di nav diplomasiyê de bigire. Lê belê, çavkaniyên nûçeyan destnîşan dikin ku di navbera Trump û Netanyahû de nakokiyên polîtîk hene, nemaze ji ber helwêsta hişk a Netanyahû ya li dijî Îranê û berdewamkirina şerê Xezeyê, ku dibe sedema tengezariyê di têkiliyên Îsraîl-Amerîkayê de.
Ev nivîs 95 car hatiye xwendin.
