HSDê bang li garantoran kir: Agirbest tê binpêkirin

PeyamaKurd- Navenda Ragihandinê ya Hêzên Sûriyeya Demokratîk (HSD) ragihand ku ligel peymana agirbestê jî komên çekdar ên girêdayî Şamê êrîşên xwe yên li Kobanî û Girtîgeha Eqtanê ya li Reqayê didomînin.

HSDê di daxuyaniya xwe de diyar kir ku di heman dema topbarankirina Girtîgeha Eqtanê de ku çekdarên DAIŞê lê ne, wan koman êrîşî derdora bajarokê Sirînê û gundê Xirûsê yê li başûrê Kobaniyê jî kiriye.

Di daxuyaniyê de hat gotin ku tevahiya gundewarê başûr û başûrrojavayê Kobaniyê rastî topbaraneke dijwar hatiye û di dema amadekirina vê raporê de jî topbaran berdewam dike.

HSDê dîmenên ku ji aliyê hesabên wan komên çekdar ve hatine belavkirin û topbarana li başûrê Kobaniyê nîşan didin jî li ser daxuyaniya xwe zêde kir.

HSDê destnîşan kir ku ev yek binpêkirina agirbestê ye ku du roj in li pey hev dubare dibe û got, tenê doh 22 binpêkirinên hatine tomarkirin ku di nav de êrîşên li Kobanî, Hesekê û Girtîgeha Eqtanê hene.

Herwiha HSDê bal kişand ser rewşa mirovî û ragihand ku Şam siyaseta "cezakirina bikom" didomîne û got: "Av û elektrîka bajarê Kobaniyê qut kirine û di vê zivistana dijwar de rê nadin ku sotemenî derbas bibe. Di heman demê de ava Girtîgeha Eqtanê ya li Reqayê jî qut kiriye ku ev yek gefeke rasterast e li ser jiyana girtiyan û encamên mirovî yên metirsîdar bi xwe re tîne."

Hêzên Sûriyeya Demokratîk Şamê wekî berpirsyara van binpêkirinan nîşan da û tekez kir mezin e li ser ewlehî û ku hedefgirtina deverên niştecihbûnê û cihên hesas, bi taybetî girtîgehên DAIŞiyan, gefeke û bangî welatên garantor kir ku demildest tedbîrên bibandor bigirin da ku van binpêkirinan rawestînin û cîbicîkirina agirbestê misoger bikin.