Xwendekarên Zanîngeha Kurdistanê: Em bangewaziyên faşîst red dikin

PeyamaKurd – Komek ji xwendekarên Zanîngeha Kurdistanê ya li bajarê Sineyê, bi daxuyaniyeke nivîskî ragihand ku bangewaziyên ji bo xwepêşandanan ên ku di medyayên "faşîst ên Îranî" de li ser navê wan hatine belavkirin, dûrî rastiyê ne. Xwendekaran destnîşan kir ku ew tu feraseteke ku mafê diyarkirina çarenûsa miletê Kurd nas neke, wekî "mixalif" an jî "azadîxwaz" qebûl nakin.

Di daxuyaniyê de ya bi sernavê "Kurdistan gora faşîstan e", xwendekaran bal kişand ser çend xalên girîng:

Redkirina propagandaya medyayê

Xwendekaran diyar kir ku medyayên alîgirên sîstema navendî (çi yên rejîma Îslamî bin, çi jî yên opozîsyona şahparêz bin) hewl didin dengê xwendekarên Kurd ji bo berjewendiyên xwe bi kar bînin û dengê wan sansur bikin. Wan ragihand ku dîroka Kurdistanê ya ji Simko Şikak û Qazî Mihemed heta îro, bersiva herî zelal e li dijî vê ferasetê.

Rexne li opozîsyona "sexte û alîgirên Pehlewî 

Xwendekaran bi tundî alîgirên sîstema şahînşahî (Pehlewî) û opozîsyona ku xwe wekî demokrat nîşan dide rexne kir û gotin: 

Em bawer dikin ku gotara faşîst a Îranî, ji rejîma şahînşahî bigire heta Komara Îslamî û opozîsyona wan a sexte, tu potansiyela wan a azadîxwazî û demokrasiyê nîne. Ev feraset bi tevgera azadîxwaz a Kurdistanê re nagunce."

Şertê têkoşîna hevpar: Naskirina mafê serweriyê 

Xwendekaran peyameke zelal da aliyên Îranî û gotin ku heya mafê diyarkirina çarenûsa miletên bindest neyê naskirin û li "salên kolonyalîzm, mêtingerî û cudakariyê" mikur neyên, tu mizakere û têkoşîneke hevbeş ne pêkan ne. Wan anî ziman ku neteweyê Kurd ji mêj ve li kolanan e û di vê rêyê de berdêlên giran daye.

Referensa li ser Şoreşa Jîna Emîniyê

Di daxuyaniyê de hat destnîşankirin ku dengê rastîn ê xwendekarên Sineyê di dirûşm û sirûdên Şoreşa "Jîna" de diyar e.

Xwendekaran soza xwe nû kirin ku wekî sala 1967-68an ku li dijî rejîma Pehlewî li ber xwe dabûn, îro jî dê li dijî her cure faşîzmê mafên xwe biparêzin.

"Em bi xwe biryarê didin"

Di dawiya daxuyaniyê de hat ragihandin ku tu kes nikare li ser navê wan biryara çalakiyan bide: 

Pêwîstî, şêwaz û dema beşdarbûna di xwepêşandanan de, dê bi tenê ji aliyê xwendekarên Zanîngeha Kurdistanê bixwe ve were diyarkirin û ragihandin."