باڕاک: ڕێککەوتنی نێوان حکومەتی سووریا و هەسەدە هەنگاوێکی مێژووییە

پەیامی کورد... باڕاک: ڕێککەوتنی نێوان حکومەتی سووریا و هەسەدە هەنگاوێکی مێژووییە

تۆم باڕاک، نێردەی تایبەتی ئەمریکا بۆ سووریا، ستایشی ڕاگەیاندنی گەیشتن بە ڕێککەوتنێکی گشتگیری نێوان حکومەتی سووریا و هێزەکانی سووریای دیموکرات (هەسەدە)ی کرد و بە وێستگەیەکی مێژوویی لە ڕێڕەوی سووریا بەرەو ئاشتەوایی نیشتمانی، یەکڕیزی و سەقامگیرییەکی بەردەوام وەسفی کرد.

باڕاک جەختی کردەوە کە ئەو ڕێککەوتنەی بە وریاییەوە گفتوگۆی لەسەر کراوە و پشتبەست بە چوارچێوەکانی پێشوو و هەوڵە نوێیەکانی کەمکردنەوەی گرژییەکان بووە، ڕەنگدانەوەی پابەندبوونی هاوبەشە بە گشتگیری، ڕێزی بەرامبەر و پاراستنی شکۆی هەموو پێکهاتەکانی کۆمەڵگەی سووریا.

ڕوونیشی کردەوە کە ڕێککەوتنەکە بۆ حکومەتی سووریا نوێنەرایەتی پابەندبوونێکی چەسپاو دەکات بە هاوبەشییەکی نیشتمانیی ڕاستەقینە و حوکمڕانییەکی گشتگیر، ئەویش لە ڕێگەی ئاسانکاریکردن بۆ تێکەڵکردنی قۆناغ بە قۆناغی پێکهاتە سەربازی، ئەمنی و کارگێڕییەکان لەناو دامەزراوەکانی دەوڵەتدا، لەگەڵ ڕەخساندنی دەرفەت بۆ نوێنەرە دیارەکانی "هەسەدە" بۆ ئەوەی لە ئاستە باڵاکانی سەرکردایەتیدا بەشدار بن.

نێردە ئەمریکییەکە ئاماژەی بەوە کرد کە هێزی سووریا لە لەخۆگرتنی فرەچەشنییەکەیدایە و وەڵامدانەوەی خواستە ڕەواکانی هەموو ڕۆڵەکانیەتی، جەختیشی کردەوە کە ئەم شێوازە سەروەری بەسەر تەواوی خاکی سووریادا بەهێز دەکات و پەیامێکی ڕوونی کرانەوە و دادپەروەری بۆ کۆمەڵگەی نێودەوڵەتی دەنێرێت.

باڕاک وتیشی گەلی کورد گەواهی هەنگاوی گرنگ بووە بەرەو یەکسانی و هەستی ئینتیما، ئەویش لە ڕێگەی جێبەجێکردنی مەرسوومی سەرۆکایەتیی ژمارە ١٣ کە ڕەگەزنامەی سووری بۆ ئەوانە گەڕاندەوە کە بەهۆی ڕێکارەکانی دوورخستنەوەی پێشوو زیانیان بەرکەوتبوو، هەروەها دانی نا بە زمانی کوردیدا وەک زمانێکی نیشتمانی لە تەنیشت زمانی عەرەبی و ڕێگەی دا بە خوێندنی لە ناوچە پەیوەندیدارەکاندا، لەگەڵ دەستەبەرکردنی پاراستن لە جیاکاری.

ئاماژەی بەوەش کرد کە ئەم ڕێکارانە مەزڵوومیەتێکی مێژوویی ڕاست دەکەنەوە و جەخت لە پێگەی ڕەسەنی کورد لەناو نیشتمانی سووریادا دەکەنەوە، و ئاسۆکانی بەشداریی تەواوەتییان لە کێشانی نەخشەی داهاتوویەکی ئارام و گشتگیردا دەکەنەوە.

نێردە ئەمریکییەکە پێزانینی خۆی بۆ ئەو هەنگاوە بوێرانە دەربڕی کە هەردوولا گرتوویانەتە بەر، بەو پێیەی حکومەتی سووریا بازنەی گشتگیریی فراوانتر کرد و بە کردەیی مافەکانی بەخشی، لە بەرامبەردا کۆمەڵگە کوردییەکان چوارچێوەیەکی نیشتمانیی یەکگرتوویان پەسەند کرد کە ڕێز لە بەشدارییەکانیان دەگرێت و خزمەت بە بەرژەوەندیی گشتی دەکات.

باڕاک لە کۆتاییدا ئاماژەی بەوە کرد کە ئەم پەرەسەندنانە ڕێگە خۆش دەکەن بۆ دووبارە بونیادنانەوەی دامەزراوەکان و گێڕانەوەی متمانە و ڕاکێشانی ئەو وەبەرهێنانە پێویستانەی بۆ پرۆسەی ئاوەدانکردنەوە گرنگن، و چەسپاندنی ئاشتییەکی بەردەوام بۆ هەموو سوورییەکان، جەختیشی کردەوە کە ئەمڕۆ سووریا لەبەردەم گەڕانەوەی پێگەی خۆی وەک چراخانێکی سەقامگیری و هیوا لە ناوچەکە و دەرەوەی ناوچەکەشدا وەستاوە.