عەون: پەیوەندییەکانمان لەگەڵ "سوریای نوێ" بە ئاراستەیەکی دروستدا گەشە دەکات

لە وتارێکی تەلەفزیۆنیدا لە باشووری لوبنانەوە بە بۆنەی ڕۆژی سەربەخۆییەوە، جۆزێف عەون، سەرۆکی لوبنان جەختی لەوە کردەوە کە "سەربەخۆیی لە ڕووبەڕووبوونەوە لەگەڵ ڕاستییەکان دەست پێدەکات"، جەختی لەوە کردەوە کە باشوور وەک گۆڕەپانێک دەمێنێتەوە کە مانای دەوڵەت و سەروەرییەکەی تێدا تاقیدەکرێتەوە.

عەون ئاماژەی بەوەدا کە دەوڵەت "بە یەک دەسەڵات و یەک ئاڵا و یەک پرۆسەی بڕیاردان" دەگەڕێتەوە باشوور، ئاماژەی بەوەشکرد کە سەربەخۆیی تەنیا لە ڕێگەی بوونی دەوڵەت و یەکخستنی بڕیارەکانییەوە دەتوانرێت بەدەستبهێنرێت. ڕوونیشی کردەوە کە وتاری ناوبراو لە یەکەم ساڵیادی ڕۆژی سەربەخۆییدا دێت کە تیایدا وەک سەرۆکی کۆمار قسە بۆ گەلی لوبنان دەکات، ئەمەش دوای چەندین ساڵ لە بۆشایی سیاسی کە "ئێمە تێپەڕین و ڕێگە نادەین دووبارە بکرێتەوە".

دووپاتیشی کردەوە کە لوبنان بەرهەمی خەباتێکی درێژخایەنە بۆ ئازادی و سەربەخۆیی لە یەک ڕۆژدا بەدەست نەهات. ناوبراو ڕەخنەی لەو هەڵانە گرت کە لە بەڕێوەبردنی قۆناغی دوای سەربەخۆییدا ئەنجامدراون، هەروەها ئەو هۆکارە دەرەکیانەی کە وڵاتەکەیان پاڵناوە بۆ شەڕی بە وەکالەت و ململانێی ناوچەیی.

عەون جەختیشی لەوە کردەوە کە لوبنان لەبەردەم ساتێکی سەرەکیدایە، هاوشێوەی قۆناغی یەکەم و دووەمی سەربەخۆیی، لەنێو گۆڕانکارییە گەورەکانی ناوچەکەدا. ناوبراو داوای زاڵبوون بەسەر "نکۆڵیکردن"ی دوو لایەنی کرد: ئەوانەی ڕەتیدەکەنەوە دان بە گۆڕانی بارودۆخەکەدا بنێن، و ئەوانەی پێیان وایە مەزهەبێکی لوبنانی لە هاوکێشەکە دوورخراوەتەوە.

ئاماژەی بەوەشکرد، لوبنان لە بێدەوڵەتبوون بێزارە و گەلی لوبنان باوەڕیان بە پڕۆژەی دەوڵەتە بچووکەکان نەماوە. جەختیشی لەوە کردەوە کە ئەوەی پێویستە تەنها قۆرخکاری چەک نییە بەڵکو قۆرخکاریی وەفادارییە بۆ میللەت بەتەنها.

بە پێچەوانەوە سەرۆک کۆمار ئەو تێڕوانینەی ڕەتکردەوە کە هەر پێکهاتەیەکی لوبنانی "دۆڕاوە یان لەناوچووە" و وتی "ئەمانە گەلی ئێمەن؛ ئەوان لەگەڵ ئێمە دەمێننەوە، ئێمەش لەگەڵیان دەمێنینەوە، تەنها لەژێر چەتری دەوڵەتدا".

عەون دووپاتی کردەوە کە هەڵوێستی میانڕەو و نیشتمانیی ئەو "بەردەم هێرشەکانی هەردوولا"، بەڵام لە بژاردەی دەوڵەتی یەکگرتوو پاشگەز نابێتەوە. ئاماژەی بەوەشکرد، ڕێککەوتنی غەززە و بڕیارنامەی ئەنجوومەنی ئاسایش ڕەوایەتی ئەم ڕێبازە پشتڕاست دەکەنەوە، هەروەها پەیوەندییەکان لەگەڵ "سوریای نوێ" "بە ئاراستەیەکی دروست و لەسەر بنەمای یەکسان لە نێوان دوو دەوڵەتی خاوەن سەروەردا" پەرەدەسەنن.

هەروەها ئاماژەی بە جێبەجێکردنی ئەرکەکانی سوپای لوبنان لە باشوور و پابەندبوونی لوبنان بە ڕێککەوتنی ئاگربەست کرد و ئاماژەی بە نیشانەکانی بوژانەوەی ئابووری کرد "وەک لە ئامارەکاندا بەڵگەی لەسەرە".

لە هەنگاوێکی بەرچاودا، لە باشوورەوە ئامادەیی سوپای لوبنانی بۆ دەستبەسەرداگرتنی بنکە سنوورییە داگیرکراوەکانی دەستبەجێ لەگەڵ وەستانی پێشێلکارییەکان و کشانەوەی هێزەکانی ئیسرائیل ڕاگەیاند و ئامادەیی دەوڵەتی دووپاتکردەوە بۆ پێشکەشکردنی خشتەی کاتیی ڕوون بۆ ئەو لیژنەیە پێنج کەسییە.

هەروەها ئامادەیی لوبنانی بۆ دانوستان، لەژێر چاودێری نێودەوڵەتیدا، ڕێککەوتنێک ڕاگەیاند کە وەستانی هەمیشەیی دوژمنایەتییەکان چەسپێنێت، هاوکات لەگەڵ میکانیزمێکی نێودەوڵەتی بۆ پاڵپشتیکردنی سوپا و ئاوەدانکردنەوەی ئەوەی شەڕەکە لەناوی برد، دواجار ئامانجی قەتیسکردنی چەک لە دەوڵەت و لە سەرتاسەری خاکی لوبناندا.

عەون لە کۆتاییدا دووپاتیکردەوە کە لوبنان لاپەڕەیەکی نوێ لە مێژووی خۆیدا دەنووسێت، "لاپەڕەیەکی سەربەخۆیی نوێبووەوە"، وتی: "لە شەڕی ئەم سەربەخۆییە نوێیەدا سەردەکەوین... و لوبنان وەک نیشتمانێک بۆ هەموو کچ و کوڕەکانی دەمێنێتەوە. بژی سەربەخۆیی، بژی لوبنان".

لینا ڕەشید - لوبنان