لوبنان و سووریا ڕێککەوتننامەیەک بۆ گواستنەوەی سزادراوان واژۆ دەکەن

پەیامی کورد... لوبنان و سووریا ڕێککەوتننامەیەک بۆ گواستنەوەی سزادراوان واژۆ دەکەن

سەرۆکایەتی ئەنجومەنی وەزیرانی لوبنان ڕایگەیاند کە لوبنان و سووریا، ئەمڕۆ هەینی، بەرەو واژۆکردنی ڕێککەوتننامەیەکی فەرمی هەنگاو دەنێن سەبارەت بە گواستنەوەی سزادراوان لەو دەوڵەتەی حوکمەکەی تێدا دەرچووە بۆ دەوڵەتی ڕەگەزنامەی سزادراوەکە.

سەرۆکایەتی ئەنجومەنی وەزیران، لە بەیاننامەیەکدا کە دوێنێ پێنجشەممە لە پلاتفۆرمی "ئێکس" بڵاوکرایەوە، ڕوونی کردەوە کە مەراسیمی واژۆکردنەکە لە "سەرای حکومی" لە بەیرووتی پایتەخت بەڕێوەدەچێت، بە ئامادەبوونی نەواف سەلام سەرۆک وەزیرانی لوبنان، تاریق مەتری جێگری سەرۆکی حکومەت، و عادل نەسار وەزیری داد، لە تەک شاندێکی فەرمیی سووری بە سەرۆکایەتی مەزهەر ئەلوەیس وەزیری داد.

ئەنجومەنی وەزیرانی لوبنان لە ٣٠ی کانوونی دووەمی ڕابردوودا، ڕێککەوتننامەکەی نێوان بەیرووت و دیمەشقی پەسەند کردبوو، کە میکانیزمی گواستنەوەی کەسانی سزادراو لە وڵاتی دەرچوونی حوکمەکەوە بۆ وڵاتی ڕەگەزنامەکەیان ڕێکدەخات، بە مەبەستی تەواوکردنی جێبەجێکردنی ئەو سزایانەی بەسەریاندا سەپێنراوە.

لەو چوارچێوەیەدا، تاریق مەتری جێگری سەرۆکی حکومەتی لوبنان جەختی کردەوە کە ڕێککەوتننامەکە ڕێگە خۆش دەکات بۆ ڕادەستکردنی زیاتر لە ٣٠٠ دەستبەسەرکراوی سووری بە دەسەڵاتدارانی سووریا، بۆ ئەوەی ماوەی سزادانیان لە ناوخۆی وڵاتەکەیاندا تەواو بکەن.

مەتری ڕوونی کردەوە کە ڕێککەوتنەکە ئەو سزادراوانە دەگرێتەوە کە زیاتر لە دە ساڵیان لە زیندانەکانی لوبناندا بەسەر بردووە، کە ئەم ماوەیەش یەکسانە بە نزیکەی حەوت ساڵی کردەیی لە سزاکە.