فەرماندەیی هێزەکانی سووریای دیموکرات لەگەڵ وەزیری دەرەوەی فەڕەنسا جێبەجێکردنی ڕێککەوتنی کانوونی دووەم تاوتوێ دەکەن

پەیامی کورد... فەرماندەیی هێزەکانی سووریای دیموکرات لەگەڵ وەزیری دەرەوەی فەڕەنسا جێبەجێکردنی ڕێککەوتنی کانوونی دووەم تاوتوێ دەکەن

مەزڵووم عەبدی، فەرماندەی گشتیی هێزەکانی سووریای دیموکرات (هەسەدە)، دیدارێکی فەرمیی لەگەڵ جان نوێل بارۆ، وەزیری دەرەوەی فەڕەنسا لە شاری هەولێری هەرێمی کوردستان ئەنجامدا، بە بەشداریی ڕووهەڵات عەفرین فەرماندەی یەکینەکانی پاراستنی ژن (یەپەژە) و ئیلهام ئەحمەد هاوسەرۆکی پەیوەندییەکانی دەرەوە لە بەڕێوەبەریی خۆسەر.

لە دیدارەکەدا باس لە ڕێگە و میکانیزمەکانی جێبەجێکردنی ڕێککەوتنی ٢٩ی کانوونی دووەم کرا، لەگەڵ جەختکردنەوە لەسەر پێویستیی پابەندبوونی تەواو بە بەندەکانییەوە، جگە لە تاوتوێکردنی بەردەوامیی هاوکاریی هاوبەش لە شەڕی دژی ڕێکخراوی داعش و دەستەبەرکردنی پاراستن و ئاسایشی ئەو شوێنانەی چەکدارانی ڕێکخراوەکە و خێزانەکانیانی تێدا دەستبەسەرە.

هەروەها کۆبوونەوەکە باسی لە گرنگیی پاراستنی تایبەتمەندیی ناوچە کوردییەکان و پاراستنی مافەکانی گەلی کورد لە سووریا کرد، لەگەڵ تاوتوێکردنی دۆسیەی تێکەڵکردنی هێزە سەربازی و ئەمنییەکان بە هەموو وردەکارییەکانییەوە، لەوانەش یەکینەکانی پاراستنی ژن (یەپەژە)، بەو شێوەیەی کە بەشدار بێت لە بەهێزکردنی سەقامگیری و ئاسایش لە تەواوی ناوچەکەدا.

وەزیری دەرەوەی فەڕەنسا لای خۆیەوە پشتیوانیی وڵاتەکەی بۆ جێبەجێکردنی ڕێککەوتنەکە دووپاتکردەوە و جەختی لە گرنگیی ئەم قۆناغە کردەوە لە چەسپاندنی سەقامگیری و بەردەوامبوونی هەوڵە نێودەوڵەتییەکان لە شەڕی دژی تیرۆردا.

لای خۆشیانەوە، فەرماندەیی هێزەکانی سووریای دیموکرات پابەندبوونی خۆی بە جێبەجێکردنی ڕێککەوتنی ٢٩ی کانوونی دووەم و بەردەوامبوون لە شەڕی دژی ڕێکخراوی داعش و دەستەبەرکردنی ئاسایشی زیندانەکانی چەکدارانی ئەو ڕێکخراوە و خێزانەکانیان دووپاتکردەوە.

هەروەها هەسەدە جەختی لە پێویستیی گەڕانەوەی ئاوارەکان بۆ ناوچەکانی خۆیان کردەوە، بەتایبەت لە عەفرین و سەرێ کانیێ، و ئاماژەی بە گرنگیی بەشداریی کاریگەر لەسەر ئاستی نیشتمانی کرد، بەو شێوەیەی یارمەتیدەر بێت لە گەیشتن بە چارەسەرێکی سیاسیی گشتگیر کە مافی هەموو پێکهاتەکانی گەلی سووریا مسۆگەر بکات.

لە کۆتایی دیدارەکەدا، فەرماندەی گشتیی هێزەکانی سووریای دیموکرات ستایشی ئەو ڕۆڵە ئەرێنییەی کرد کە فەڕەنسا لەم قۆناغەدا دەیگێڕێت، بەو پێیەی کاریگەریی هەیە لە پشتگیریکردنی هەوڵەکانی ئاشتی و سەقامگیری.