بانگەواز بۆ کردنەوەی ڕێڕەوێکی ئارام بۆ کشانەوەی شەڕڤانانی هەسەدە لە زیندانی "ئەقتان" لە گوندەواری ڕەققە

پەیامی کورد... بانگەواز بۆ کردنەوەی ڕێڕەوێکی ئارام بۆ کشانەوەی شەڕڤانانی هەسەدە لە زیندانی "ئەقتان" لە گوندەواری ڕەققە

جیا کۆبانێ، بەرپرسی زیندانی "ئەقتان" لە باکووری ڕەققە، ڕۆژی پێنجشەممە، داوای کردنەوەی ڕێڕەوێکی ئارامی کرد بۆ کشانەوەی شەڕڤانانی هێزەکانی سووریای دیموکرات (هەسەدە) لە "مەترسیدارترین زیندان" لە گوندەواری ڕەققە.

کۆبانێ کە فەرماندەیەکی هێزەکانی سووریای دیموکراتە، لە ڕێگەی گرتەیەکی ڤیدیۆییەوە وتی: "وەک هێزەکانی سووریای دیموکرات لە زیندانی ئەقتان؛ ئێمە لە ئێستادا پاسەوانیی زیندانی ئەقتان دەکەین کە چەکدارانی ڕێکخراوی دەوڵەتی ئیسلامی (داعش)ی تێدا دەستبەسەرە لە ڕەققە"، ئاماژەی بەوەش کرد "وەک چۆن هەموو جیهان دەیزانێت، هێشتا ڕێکخراوی داعش هەڕەشەیەکی جیهانییە".

وتیشی: "بانگەواز ئاراستەی هاوپەیمانی نێودەوڵەتی و هەموو لایەنە پەیوەندیدارەکان دەکەین، و هەوڵ دەدەین بەرپرسیارێتی ئەم زیندانە بەگوێرەی گەرەنتی نێودەوڵەتی ڕادەست بکەین، هەروەها داوای ڕێڕەوێکی ئارام بۆ خۆمان دەکەین بە مەبەستی گەیشتن بە ناوچە ئارامەکان لە ڕێگەی هەمان گەرەنتییە نێودەوڵەتییەکانەوە".

ئەو بەرپرسەی پاراستنی زیندانی ئەقتان ڕوونی کردەوە کە "لە ماوەی چەند ڕۆژی ڕابردوودا، ڕەققە ڕووبەڕووی هێرشی یەک لە دوای یەک بووەوە، لە کاتێکدا هێزەکانمان کشانەوە، ئێمەش وەک پاسەوانانی زیندانەکە دەمانتوانی بچینە ناوچە ئارامەکانمان، بەڵام ئێمە لە مەترسییەکانی ئەم زیندانە و بەرپرسیارێتییەکانمان بەرامبەر بە هەڕەشەکە دەزانین".

ئاماژەی بەوەش کرد: "ڕووبەڕووی هێرشێکی توند دەبینەوە لەلایەن ئەو کەسانەی هەوڵی کۆنترۆڵکردنی زیندانەکە دەدەن، و گەیشتووینەتە خاڵی کۆتایی".

کۆبانێ ئاماژەی بەوەش کرد کە ئەوان بێ ئاو و کارەبا و سووتەمەنین و پێداویستییە خۆراکییەکانیان "زۆر سنووردارە".