پەیامێک لە سەرۆکی حکوومەتی هەرێمی کوردستان ەوە

پەیامی کورد   ...   پەیامێک لە سەرۆکی حکوومەتی هەرێمی کوردستان ەوە

سەرۆکی حکوومەتی ھەرێمی کوردستان سوپاسی خەڵکی کوردستان دەکات بۆ پشوو درێژییان بەرانبەر ئەو ھێرشەی کرایە سەر کێلگەی کۆرمۆر.

دەقی پەیامی مەسروور بارزانی.

سوپاسی خەڵکی کوردستان دەکەم بۆ پشوودرێژی و خۆڕاگرییان کە لە دوای ھێرشە تیرۆریستییەکەی چەند رۆژی ڕابردوو بۆ سەر ژێرخانی گازی ھەرێمی کوردستان، تووشی کەمی کارەبا بوونەوە. خەڵکی نیشتیمانپەروەری کوردستان بەگشتی ئەم ھێرشەیان شەرمەزار کرد کە دژی بەرژەوەندی ھەموو ھاووڵاتییان بوو و بووە ھۆی بڕینی کارەبای ملیۆنان کەس لە ھەرێمی کوردستان و عێراق دا.

ئەمڕۆ لەدوای ئامادەکارییە تەکنیکییەکان، لەگەڵ کۆمپانیای دانا گاز گەیشتینە ڕێککەوتن بۆ دووبارە دەستپێکردنەوەی بەرھەمھێنان و گەڕاندنەوەی کارەبا لە چەند کاتژمێری داھاتوودا. لەگەڵ بەڕێوبەرایەتی کۆمپانیاکە قسەم کرد و سوپاسی بەڕێوبەرایەتی و گشت کارمەندەکانم کرد بۆ خۆڕاگری و ئیرادەی بەھێزیان. ئەمە یازدەمین ھێرشە بۆ سەر کێڵگەکە و ئامادەیی ئەوانیش بۆ بەردەوامبوون لەسەر کارەکەیان، نیشاندەری خۆڕاگرییانە. دڵنیاشم کردنەوە کە لەگەڵ حکوومەتی فیدراڵ، ھەموو ھەوڵێک دەدەین بۆ کۆتایی ھێنان بە ھێرشە تیرۆریستییەکان و بەسزاگەیاندنی ئەنجام دەرانی ھێرشەکە و ڕێگەگرتن لە دووبارەبوونەوەی لە داھاتوودا. لە ھەمان کات دا لەگەڵ ھاوبەشە نێودەوڵەتییەکانمان کار دەکەین لە پێناو دابینکردنی پێداویستییەکانی پاراستنی گەلەکەمان و ژێرخانی ئابووری و وەبەرھێنانمان.

ئەم ھێرشە نابێت بەبێ لێپرسینەوە تێپەڕێت و نابێت ھێرشەکان ببنە ڕووداوی ئاسایی. 

دیار بوو کە دوژمن و ناحەزان و بەکرێگیراوەکانیان چاویان بە پێشکەوتنی کوردستان و ئاسوودەبوونی خەڵک ھەڵنایەت و بە شێوەیەکی ترسنۆکانە و نامەردانە، ئەم ھێرشەیان کرد و دژی ڕووناکی وەستانەوە و ھەوڵیان دا تاریکی بگەڕێننەوە. 

لەگەڵ سەرۆک وەزیرانی فیدراڵ محەممەد شیاع سوودانی باسمان کردووە کە دەبێت ئەنجامدەرانی ئەم ھێرشە ھەر لایەن و گروپێک بن و لە ھەر کوێ بن لێپرسینەوەیان لەگەڵ دا بکرێت و ڕادەستی یاسا بکرێن. ئەوە تاکە ڕێگرییە و چاوەڕوانین ڕێوشوێنی جیددی و کردارەکی بگیرێتەبەر. چوونکە عێراق ناتوانێت وەبەرھێنانی بیانی بۆ خۆی ڕابکێشێت لە کاتێک دا میلیشیا و گرووپە چەکدارییە لە یاسا دەرچووەکان و مافیا گەندەلەکان بە بێ ھیچ سزا و لێپێچینەوەیەک، ھێرش بکەنە سەر ژیرخانی ئابووری ووڵات و دڵیان بە ئازاری خەڵکی کوردستان خۆش بکەن.

سوپاسی تیمی تەکنیکی ھەردوو وەزارەتی سامانە سرووشتییەکان و وەزارەتی کارەبا و ھێزە ئەمنییەکان دەکەم بۆ کارکردن و ماندووبوونیان لە چەند ڕۆژی ڕابردوودا.  

دووپاتی دەکەینەوە، ئەم ھێرشە ترسنۆکانە لە باشترکردنی ژیانی ھاووڵاتیان نامان وەستێنن. ئێمە بەردەوام دەبین لە کارکردن و درێژەدان بە کاروانی پێشکەوتن و ئاوەدانی و داوا لە خەڵکی کوردستان دەکەم بەردەوام بن لە پشتگیریکردنی حکوومەتەکەیان.

مەسروور بارزانی

سەرۆکی حکوومەتی ھەرێمی کوردستان