ڕاگەێندراوێک لە وەزارەتی ناوخۆوە سەبارەت بە ئاژاوەگێڕییەکانی سەر ڕێگای گوێڕ-ھەولێر

پەیامی کورد   ...   ڕاگەێندراوێک لە وەزارەتی ناوخۆوە سەبارەت بە ئاژاوەگێڕییەکانی سەر ڕێگای گوێڕ-ھەولێر

وەزارەتی ناوخۆی حکوومەتی ھەرێمی کوردستان لەبارەی گرژییەکانی ڕێگای گوێڕ-ھەولێر دەڵێت، "چیتر ڕێگە نادەین سوود لە نیازپاکی دام ودەزگاکانی ھەرێمی کوردستان وەربگیرێت و سنوورێک بۆ ئەو کارە تێکدەرانە دادەندرێت".

دەقی ڕاگەێندراوەکەی وەزارەتی ناوخۆ.

ماوەیەکە لە لایەن چەند دەستێکی دەرەکی و بە فیتی ھەندێک کەس و لایەنی ناوخۆیی، ھەوڵی نانەوەی ئاژاوە دەدرێت. نوێترین ھەوڵی تێکدەرانە بە ئامانجگرتنی کێڵگەی غازی کۆرمۆر دەستی پێکرد کە مەبەست لێی ڕاگرتنی بەرھەمھێنانی کارەبای ھەرێم بووە. دوای ئەوەش حکوومەتی ھەرێمی کوردستان سووتەمەنی شلی وەک جێگرەوەی گاز بۆ دابین کردنی کارەبا بەکارھێنا، بە ھاندانی ناوخۆیی و دەرەکی، کۆمەڵە کەسێکی ئاژاوەگێڕ ڕێگای تانکەرەکانی گواستنەوەی سووتەمەنی و ھاووڵاتیانیان لە سنووری گوێڕ گرت و تەقەیان بەسەر خەڵک و ڕێبوارانی ئەو ڕێگایەدا کرد. 

لە ئەنجامی تەقەی ئەو کەسانەدا ھاووڵاتییەک بووە قوربانی و گیانی لە دەست دا و ژمارەیەک کەسی تریش بریندار بوون. 

چیتر ڕێگە نادەین سوود لە نیازپاکی دامودەزگاکانی ھەرێمی کوردستان وەربگیرێت و سنوورێک بۆ ئەو کارە تێکدەرانە دادەندرێت. بۆ ڕاگرتنی ئەو جۆرە ئاژاوەگێڕییانە، بەپێی یاسا بەرکارەکان لە ھەرێمی کوردستان مامەڵە لەگەڵ کەسانی ئاژاوەگێڕ دەکرێت و کەس لە سەرووی یاسا نیە.

وەزارەتی ناوخۆی حکوومەتی ھەرێمی کوردستان

٢٩ی تشرینی دووەمی ٢٠٢٥