پەیامی کورد   ...   بە هۆی فشاری سیاسی یەوە شاعیر و فەرهەنگنووسی كوردی ڕۆژهەڵاتی بە ناچاری ڕۆژهەڵاتی بەجێهێشت

شاعیر و فەرهەنگنووسی كورد، سەحەر موعێزی و كوڕە نووسەرەكەی، پووریا سادقی، دوای ماوەیەك لە نادیاری چارەنووسیان، ئێرانیان بەجێهێشت. 
هۆكاری جێهێشتنی ووڵات بۆ “ فشاری سیاسی ڕێژیمی كۆماری ئیسلامی ئێران” دەگەڕێتەوە.

بەپێی زانیاریی سەرچاوەكان كە نەیانویست ناویان ئاشكرا بكرێت، خاتوو موعێزی و كوڕەكەی نزیكەی مانگێك لەمەوبەر سەفەری تاران یان كردبوو و لەو كاتەوە چارەنووسیان نادیار بوو.

بەڵام بنەماڵەكەیان دڵنیایی یان داوە هەردووكیان بە سەلامەتی سنووریان تێپەڕاندووە و ئێستا لە شوێنێكی ئارام دان.

سەحەر موعێزی، خەڵكی سنە، یەكێك لە كەسایەتییە دیارەكانی بواری ئەدەب و فەرهەنگە. خاوەنی چەندین بەرهەمە، لەوانە “فەرهەنگی پازار”، “ڤەژین”، “ڕێنووسی ئەوین” و نەرمامێری “ئەلفبێ” بۆ فێربوونی زمانی كوردی، هەروەها زیاتر لە ١٣ كتێبی منداڵانی وەرگێڕاوە.

پووریا سادقی، كوڕی خاتوو موعێزی، خوێندكاری زانستی كۆمپیوتەر و نووسەرێكی گەنجە. لە بەرهەمەكانی ڕۆمانەشێعری “لە خاچدراو”، “ئاوێنەی ئاشقان”، “ڕۆمانی ئەگریجەكان” ن.