Kongresmanê Amerîkî: Kurd û Îsraîl hevpeymanên herî girîng ên Amerîkayê ne

PeyamaKurd – Kongresmanê berê yê Amerîkî Trent Franks, di hevpeyvînekê de li gel Kurdistan24ê nirxandinên girîng li ser siyaseta Amerîkayê ya Rojhilata Navîn kirin. Franks destnîşan kir ku Kurd, li gel Îsraîlê, du hevpeymanên herî stratejîk û girîng ên Amerîkayê ne li herêmê.

Franks tekez kir ku divê Washington di astên siyasî, stratejîk û exlaqî de têkiliyên xwe bi Kurdan re xurt bike. Wî got, "Kurd gelekî esilzade ne û bi dehsalan e cesareteke mezin nîşan didin. Ez bawer im ku avakirina hevpeymaniya herî xurt bi hikûmet û gelê Kurd re gaveke rast e." Her wiha bal kişand ser giringiya çavkaniyên enerjiyê yên Herêma Kurdistanê û diyar kir ku parastina dostên Amerîkayê yên li Kurdistanê ji bo ewlehiya enerjiya cîhanê jî krîtîk e.

Ev daxuyanî di demekê de tên ku rêveberiya Amerîkayê zextên xwe li ser hikûmeta Iraqê zêde kirine. Nûnerê Taybet ê Amerîkayê Mark Sawaya û şêwirmendên nêzîkî Trump hişyarî dane Bexdayê ku hebûna milîsên çekdar gefê li serweriya dewletê dixwe. Hat ragihandin ku heke Iraq van koman kontrol neke, dibe ku rûbirûyê cezayên aborî û tecrîda navneteweyî bibe.

Di vê çarçoveyê de, Franks peyameke zelal da ku divê Amerîka li kêleka Kurdan bisekine û mafê wan ê azadî û serxwebûnê biparêze.