Piştî êrîşa Îsraîlê, Aoun bang li artêşa Lubnanê dike: Welat biparêzin!

PeyamaKurd – Piştî ku hêzên Îsraîlê li bajarokê sînorî yê Blida operasyonek pêk anîn û di encamê de karmendekî şaredariyê hat kuştin, Serokkomarê Lubnanê Michel Aoun ferman da artêşê ku "ax û gelê xwe biparêze". Ev pêşhat di demekê de qewimî ku êrîşên asmanî yên Îsraîlê li başûrê welêt dibûn sedema şewatan û aloziyê kûrtir dikirin.

Li gorî daxuyaniya serokatiya Lubnanê, Aoun roja Pêncşemê di civîna xwe ya bi Sererkanê Artêşê Rudolf Haykal re, bûyera li Blida weke "beşek ji zincîreya kiryarên êrîşkar ên Îsraîlê" bi nav kir. Wî ji artêşê xwest ku "li hemberî her destdirêjiyeke Îsraîlê ya li ser herêmên rizgarkirî yên li başûr bisekinin."

Ajansa Nûçeyan a Neteweyî ya Lubnanê (NNA) ragihand ku leşkerên Îsraîlê derdora saet 01:30ê sibê ketine bajarokê Blida û karmendê şaredariyê Îbrahîm Salame di dema razayî de gulebaran kirine û kuştine. Hat diyarkirin ku hêzên Îsraîlê piştî operasyonê saet di 4:00 de ji herêmê vekişiyane.

Ji aliyê xwe ve, artêşa Îsraîlê bûyer piştrast kir û îdia kir ku "di dema operasyoneke li dijî binesaziya Hizbullahê de li Blida teqe hatiye kirin". Piştî bûyerê yekîneyên artêşa Lubnanê li herêmê hatin bicihkirin, lê derbarê hûrguliyan de zanyarî nehatin dayîn.

Di vê navberê de, Hizbullah a Lubnanê banga xurtkirina şiyanên berevaniyê yên artêşê kir da ku bikaribe li hember "êrîşên berdewam ên Îsraîlê" raweste.

Hevdem, firokeyên şer ên Îsraîlê li navçeyên Cermûk, Xirdalî û Mehmûdiyê yên li başûrê Lubnanê çendîn êrîşên esmanî pêk anîn, ku di encamê de şewat derketin. Îsraîl dibêje ku ev operasyon ji bo rêgirtina li ji nû ve çekdarbûna Hizbullahê ne, lê rayedarên Lubnanê tekez dikin ku ev kiryar binpêkirina peymana agirbestê ye ku salek berê bi navbeynkariya Amerîkayê hatibû îmzekirin.

Ev nivîs 27 car hatiye xwendin.