Li Xezzeyê navê "Kurdistan" li pitikek nûbûyî hat kirin

PeyamaKurd – Li Şerîda Xezzeyê, ku bandorên giran ên şerê Îsraîl-Hemasê lê tên hîskirin, malbatekê navê pitika xwe ya nûbûyî kir "Kurdistan" da ku evîna xwe ji bo gelê Kurdistanê nîşan bide.

"Kurdistan li Xezzeyê ji dayik bû"

Bavê pitikê Mihemed el-Hebbal, jidayikbûna keça xwe li ser medyaya civakî ragihand. El-Hebbal wêneyek xwe bi pitika xwe ya nûbûyî re parve kir û li ser wê nivîsand "Kurdistan li Xezzeyê ji dayik bû."

Di peyama xwe de, El-Hebbal got:

"Îro, Xwedê me bi keçek xweşik pîroz kir û me navê wê Kurdistan kir. Xwîn û canê me deyndarê gelê Kurdistanê ne. Ji ber evîna we, me navê keça xwe Kurdistan lê kir. Bila Xwedê Kurdistanê, gelê wê û Xezzeya me ya delal biparêze û hêzê bide me ku em Orşelîmê rizgar bikin."

Dayika pitika ku li Nexweşxaneya Avde ji dayik bû wekî May Hisham Kemal hat nasîn. Ev jesta bavê Filistînî wekî nîşanek spasdariyê ji bo piştgirî û hevgirtina demdirêj a Herêma Kurdistanê bi Xezzeyê re hat dîtin.

Berdewamiya hewldanên alîkariyê ji Kurdistanê bo Xezzeyê

Ji destpêka şerê Îsraîl-Hemasê ve, gelek sazî, rêxistin û komên dilxwaz li Herêma Kurdistanê kampanyayên alîkariyê yên berfireh ji bo xelkê Xezzeyê pêk anîne. Van hewldanan gelek alîkariyên mirovî û darayî anîne herêmê, û hevgirtina di navbera her du civakan de xurt kirine.

Rewşên dijwar ji bo pitikan li Xezzeyê

Li gorî daneyên Rêxistina Tenduristiyê ya Cîhanê (WHO) û UNICEFê, her meh zêdetirî çar hezar pitik li Xezzeyê çêdibin. Lêbelê, sêyek ji van pitikan ji ber kêmbûna xurekê an jî pêşwext çêdibin û hewceyê piştgiriya lênêrîna giran in.

Li gorî UNICEFê, di du salên borî de li seranserê Xezzeyê bi qasî 64,000 zarok ji ber bombebarana Îsraîlê hatine kuştin an birîndar bûne, di nav wan de herî kêm hezar pitikên nûbûyî hene.