Koalîsyona Navneteweyî karwanekî din ê lojîstîka leşkerî şand Rojavayê Kurdistanê

PeyamaKurd – Balafireke barhilgir ku materyalên lojîstîkî, alavên leşkerî û cîhazên elektronîkî hildigirt duh êvarê gihîşt baregeha Xerab El-Ceîrê ya li bakurê Hesekê. Her wiha, karwanekî ji 24 wesayîtan ji Herêma Kurdistanê ber bi baregeha Qesrikê li Hesekê ve hat şandin.

Hevpeymaniya Navneteweyî hewlên xwe yên ji bo xurtkirina baregehên xwe yên li Rojavayê Kurdistanê didomîne. Di vê çarçoveyê de, balafireke barhilgir duh êvarê li baregeha Xerab El-Ceîrê ya li bajarkê Rimêlanê yê li rojhilatê Qamişlê  daket.

Balafir, ku pêdiviyên lojîstîkî, alavên leşkerî û cîhazên elektronîkî hildigirt, di dema daketina wê de ji aliyê helîkopterên şer ên ku li herêmê dewriye digeriyan ve dihat şopandin. Karbidestan got ku ev barkirin beşek ji hewldanên hevpeymaniyê ye ji bo xurtkirina hebûna wê ya leşkerî û baregehên wê yên li Rojavayê Kurdistanê 

Roja Sêşemê, karwanekî din ê leşkerî ji 24 wesayîtan ji Herêma Kurdistanê pêkhatî, gihîşt baregeha Qesrikê ya li Hesekê. Karwan ji tankerên sotemeniyê, kamyonên ku konteynerên bi qapaxên reş pêçayî hildigirtin û wesayîtên ku qutiyên mohrkirî barkirî bûn pêk dihat.

Ev nivîs 87 car hatiye xwendin.