سوودانی چەند بڕیارێکی نوێ بۆ پەرەپێدانی کەرتی پیشەسازی دەردەکات

پەیامی کورد    ...   سوودانی چەند بڕیارێکی نوێ بۆ پەرەپێدانی کەرتی پیشەسازی دەردەکات

موحەممەد شیاع سوودانی، سەرۆکوەزیرانی عێراق، پێنجشەممە سەرپەرشتی کۆبوونەوەی خولی ئەنجوومەنی هەماهەنگی پیشەسازی کرد و تێیدا چەندین بڕیاری ستراتیژی بۆ پاڵپشتیکردنی بەرهەمی ناوخۆیی و وەبەرهێنان پەسەند کران. کۆبوونەوەکە بە ئامادەبوونی وەزیرانی دارایی، نەوت، بازرگانی، پیشەسازی و تەندرووستی بەڕێوەچوو، کە تێیدا جەخت لەسەر لابردنی ئاستەنگەکانی بەردەم پڕۆژە پیشەسازییەکان کرایەوە.
لە گرنگترین بڕیارەکاندا، ڕەزامەندی درا لەسەر تەرخانکردنی جێگەی تایبەتمەندی ژمارە ١٠ و ١١ لە بەندەری خۆر ئەلزوبەیر بۆ کارگەی ئاسنی ئیسفەنج، بە مەبەستی ئاسانکاری لە پرۆسەی هەناردەکردن و کارپێکردنی بازرگانی. هەروەها وەزارەتی پیشەسازی ڕاسپێردرا بۆ ئامادەکردنی هەلی وەبەرهێنان بە مەبەستی درووست کردنی شارێکی پیشەسازی نوێ لە ناوچەی ئەلسویرەی سەر بە پارێزگای واسیت.