عێراق هەماهەنگییەکی ئەمنی لەگەڵ سووریا ڕادەگەیەنێت

پەیامی کورد... عێراق هەماهەنگییەکی ئەمنی لەگەڵ سووریا ڕادەگەیەنێت

بە مەبەستی ڕێگری لە دزەکردنی "تیرۆریستان" و ئاڵوگۆڕی زانیاری، ئەمڕۆ شەممە، عێراق بوونی هەماهەنگییەکی ئەمنیی لەگەڵ سووریا ڕاگەیاند.

فەرماندەیی ئۆپەراسیۆنە هاوبەشەکانی عێراق ڕایگەیاند، ئامارەکانی دزەکردن لە سنوورەکانی سووریاوە لە ماوەی ساڵی ٢٠٢٥دا، لە سایەی ڕێوشوێنە ئەمنی و هەواڵگرییە توندەکاندا، لە چەند مانگێکدا گەیشتووەتە سفر.

قەیس مەحەمەداوی، جێگری فەرماندەی ئۆپەراسیۆنە هاوبەشەکان، ئاماژەی بەوە کرد کە هێزە عێراقییەکان لە چوار ساڵ لەمەوبەرەوە پلانێکی گشتگیریان بۆ پاراستنی سنوورەکانی نێوان عێراق و سووریا داناوە، کە درێژییەکەی نزیکەی ٦١٥ کیلۆمەترە.

زیاتریشی گوت: "بە پشتبەستن بە وانەکانی ساڵانی ٢٠١٣ و ٢٠١٤، ئەم پلانانە بەهێزکردنی قەڵغانە بەرگرییەکان، دروستکردنی تاوەر و خەندەق، چڕکردنەوەی کارە هەواڵگرییەکان، و پشتیوانیکردنی کەرتەکە بە سەرچاوەی مرۆیی و تەکنیکی لەخۆگرتووە."

مەحەمەداوی ڕوونی کردەوە: "گۆڕەپانی ئۆپەراسیۆنەکانی سووریا کاریگەری ڕاستەوخۆی لەسەر بارودۆخی ئەمنی، ئابووری و هەروەها سیاسی عێراق هەیە، ئەمەش هەماهەنگی ئەمنی لەگەڵ سووریا گرنگ دەکات.

هەروەها ئاماژەی بەوە کرد کە هەماهەنگی ئێستا لەگەڵ لایەنی سووری لەسەر ئاستی مەیدانییە لە نێوان فەرماندە و ئەفسەرانی سەر سنوور، و ئاڵوگۆڕی زانیاری، ڕادەستکردنەوەی داواکراوان و ڕێگری لە دزەکردن دەگرێتەوە، بەڵام تا ئێستا نەگەیشتووەتە ئاستە باڵاکانی نێوان سەرکردایەتییە ئەمنییەکان.