ئەنجوومەنی باڵای خانمان ئەو ئاکار نامەیەی ئامادەی کردووە لە هەڵمەتی 16ڕۆژەی تووندوتیژی خستیەڕوو

پەیامی کورد   ...   ئەنجوومەنی باڵای خانمان ئەو ئاکار نامەیەی ئامادەی کردووە لە هەڵمەتی 16ڕۆژەی تووندوتیژی خستیەڕوو

سێشەممە، 25ـی تشرینی دووەمی 2025، هاوکات لەگەڵ دەستپێکی هەڵمەتی 16ڕۆژەی بەرەنگاربوونەوەی تووندوتیژی دژی ئافرەتان و منداڵان، دکتۆرە خانزاد ئەحمەد، ئەمینداری گشتی ئەنجوومەنی باڵای کاروباری خانمان ڕایگەیاند: "سەرۆکی حکوومەت هەمیشە جەختی لەوە کردووەتەوە کە تووندوتیژی دژی ئافرەتان و کچان، لە هیچ شوێنێکی کۆمەڵگەی کوردستان دا جێگەی نابێتەوە."

ئەمینداری گشتی ئەنجوومەنی باڵای خانمان ئاماژەی بەوەش دا "نابێت چیتر بێدەنگی و گێڕانەوە و دەقە زیان بەخشەکان، لەبەردەم تاک، خێزان، کۆمەڵگە و حکوومەت دا ببنە ڕێگر بۆ بونیاتنانی کوردستانێکی دادپەروەر و یەکسان بۆ هەمووان."

خانزاد ئەحمەد ووتیشی: "ئەمساڵ تیشک دەخەینە سەر ڕەهەندێکی بنەڕەتی ئەم خەباتە کە بریتییە لە ڕۆڵی ڕاگەیاندن؛ چوونکە ئەو چیرۆکانەی دەیانگێڕینەوە، ئەو زمانەی هەڵی دەبژێرین و ئەو وێنانەی بڵاویان دەکەینەوە، شێوە بە تێگەیشتن و ڕای گشتی، نەریت، کلتوور و تەنانەت ئاسایشی کۆمەڵگەش دەدەن."

لە بەشێکی دیکەی قسەکانی دا ڕوونیکردەوە: "ماوەیەکی زۆرە ئەزموونی خانمان بە شێوەیەکی ناڕاست یان بە زیادەڕەوییەوە دەخرێتە ڕوو، زۆرجار ڕزگاربووان تۆمەتبار دەکرێن و دەنگیان پەراوێز دەخرێت، یان چیرۆکەکانیان بۆ بەرژەوەندی بازرگانی و سیاسی بەکار دەهێندرێت."

لە کۆتایی دا جەختی کردەوە: "ئەم کارە نەک تەنیا نائەخلاقییە، بەڵکوو زیان بەخشە و جیاکاری قووڵتر دەکاتەوە، هەروەها متمانەی ڕزگاربووان بەو دامەزراوانە لاواز دەکات کە بۆ پاراستنیان پێکهێندراون."

ڕاشیگەیاند: هەر لەبەر ئەم هۆکارانە ئەنجوومەنی باڵای خانمان و گەشەپێدان لە حکوومەتی هەرێمی کوردستان، بە هاوکاری لەگەڵ لایەنە پەیوەندیدارەکان و خودی خانمان و کچان و ڕۆژنامەنووسان ئاکار نامەیەکی ئامادە کردووە.