Maduro îro li New Yorkê derdikeve pêşberî dadgehê

PeyamaKurd – Amerîkayê ragihand ku Serokê Venezuelayê Nicolas Maduro dê îro li New Yorkê derkeve pêşberî dadgehê.

Zext û hişyariyên Amerîkayê yên li ser Venezuelayê bi destpêkirina êrîşeke hêzên Amerîkî li ser Caracas, paytexta Venezuelayê, û girtina Serokê Venezuelayê Nicolas Maduro û jina wî di operasyoneke şevê de û anîna wan bo Amerîkayê gihîştin lûtkeyê.

Hat destnîşankirin ku serokê Venezuelayê Nicolas Maduro û jina wî Cilia Flores dê îro saet 8:00 êvarê bi dema Tirkiyeyê derkevin pêşberî dadgehê.

Wezareta Dadê ya Amerîkayê diyar kir ku nepeniya li ser îdianameyê ku tê de sûcdariyên li dijî Maduro, jina wî Cilia Flores, kurê wî Nicolas Maduro Guerra, û herwiha Wezîrê Karên Hundir Diosdado Cabello, Wezîrê Karên Hundir ê berê Ramon Rodriguez Chacín, û serokê çeteya Tren de Aragua Hector Rusthenford Guerrero Flores hene, roja berê hate rakirin.

Îdianameya nûvekirî ku cara yekem di sala 2020an de di dema serokatiya yekem a Serokê Amerîkayê Donald Trump de hate ragihandin, tê gotin ku çar sûcdariyên cuda li dijî Maduro radixe ber çavan.