Netanyahû: Dibe ku em bi Sûriyê re li hev bikin, lê em ji prensîbên xwe tawîzê nadin

PeyamaKurd - Serokwezîrê Îsraîlê Bînyamîn Netanyahû diyar kir ku dibe ku ew bi Sûriyê re bigihîjin lihevkirinekê, lê ew ê dev ji prensîbên xwe bernedin. Netanyahû herwiha şertê damezrandina herêmeke bêçek ji Şamê heya herêma tampon a ku di bin kontrola Îsraîlê de ye, pêşniyar kir.

Netanyahû, hefteya borî serdana leşkerên Îsraîlî kir ku di pevçûnên êrîşên li ser Sûriyê de birîndar bûbûn û li nexweşxaneyê dihatin tedawîkirin.

Netanyahû got: "Ya ku em ji Sûriyê hêvî dikin ew e ku ew herêmeke tampon a bêçek, ji Şamê heya herêma tampon (a di bin kontrola Îsraîlê de), tevî Çiyayê Hermonê, ava bike. Em van deveran di destê xwe de digirin da ku ewlehiya welatiyên Îsraîlê misoger bikin û ev peywira me ye. Bi nêzîkatiya van prensîban bi niyeta baş û têgihiştinê, mimkun e ku bi Sûriyan re lihevkirinek çêbibe, lê di her rewşê de, em ê dev ji prensîbên xwe bernedin."

Trump hişyarî dabû

Daxuyaniya Netanyahû piştî wê yekê hat ku Serokê DYAyê Donald Trump li ser medyaya civakî hişyarî dabû Îsraîlê ku Sûriyê û rêveberiya nû bêîstîkrar neke û piştî demek kurt bi Netanyahû re bi telefonê axivîbû. Trump kêfxweşiya xwe ji pêşketinên li Sûriyê re yên di bin serokatiya Serok Ehmed el-Şara de, anîbû ziman.