Xamis Hançer: Êrîsa Kor Morê kiryarek terorîstî ye

PeyamaKurd - Xamis Hançer, serokê Hevpeymaniya Serweriyê (Siyade) li Iraqê, êrîşa li ser Qada Gaza Siruştî ya Kor Morê bi tundî şermezar kir, wekî "êrîşek terorîstî" bi nav kir û lêpirsînek bilez û zelal xwest.

Serokê Hevpeymaniya Serweriyê Xamis Hançer îro (27ê Mijdara 2025an) derbarê êrîşa li ser qada Kor Morê de daxuyaniyek weşand.

Hançer êrîşê wekî "êrîşek terorîstî" bi nav kir û diyar kir:

"Ev êrîş lêpirsînek bilez û zelal hewce dike ku dê aliyên li pişt wê bi zelalî eşkere bike. Pêdivî ye ku tedbîrên qanûnî yên pêwîst li dijî kesên têkildar werin girtin, bêyî ku ew kî bin an li ku derê têne piştgirî kirin."

Xamis Hançer, bi bîr xist ku wan demek dirêj e ji bo girtina dosyayên komên milîsan parêzvanî kiriye û bal kişand ser xetera ku ev kom ji bo aramiya, ewlehî, aborî û têkiliyên herêmî/navneteweyî yên Iraqê çêdikin.

Hançer diyar kir, "Qadên petrol û gazê ji aliyê van milîsan ve li gorî berjewendiyên xwe û yên piştgirên wan têne bombebaran kirin. Em her roj li dora Bexdayê, li Selahedîn û Mûsilê, li bakurê Babilê, li rojhilatê Enbarê û li Diyalayê rastî bombebaranê tên. Ev (milîs) bi desteserkirina erd, milk, zevî û malan mirovan ji cih û warên xwe derdixin û avahiya demografîk diguherînin."

Serokê Hevpeymaniya Serweriyê diyar kir ku kiryarên wiha operasyonên leşkerî ne ku bi rêbazên cûrbecûr têne kirin û got, "Carinan bi moşek û dronan, carinan bi tifing û tabancayên bêdengkirî û carinan jî bi polîtîkayên cudakar û mezhebî tevdigerin."

Hançer rewşa heyî wekî "qonaxek şermok" bi nav kir û wiha dawî li axaftina xwe anî:

"Ez bawer dikim ku doza milîsan divê bi biryareke lihevhatî ya neteweyî were çareserkirin, ne bi çekên komeke ku bi dewlet û saziyên wê ve girêdayî ye û bi derve ve girêdayî ye."