Bekayî: Daxuyaniyên li ser rûnistina nukleerî yên bi Amerîkayê re ne rast in

PeyamaKurd – Di daxuyaniyeke tekez de, Berdevkê Wezareta Derve ya Îranê, Îsmaîl Bekayî, îro 3yê Mijdara 2025an, ragihand ku welatê wî tu pêvajoyeke fermî ya danûstandinê, çi rasterast çi nerasterast, bi Dewletên Yekbûyî yên Amerîkayê re dest pê nekiriye.

Daxuyaniya Bekayî weke zelalkirinekê hat piştî ku Berdevka Hikûmeta Îranê Fatma Muhaciranî rojek berê gotibû ku "Tehranê peyamek derbarê ji nû ve destpêkirina danûstandinên nukleerî de wergirtiye."

Bekayî tekez kir ku peyam bi rêya navbeynkaran têne danûstandin û got: "Ji bo hin navbeynkaran tiştekî xwezayî ye ku hewl bidin nakokiyan çareser bikin, lê ev bi tu awayî nikare wekî destpêka pêvajoyeke danûstandinê were şirovekirin." Wî got, Washingtonê tu peyamek ji nûnerê Îranê li Omanê re negotiye.

Daxuyaniya Berdevkê Îranê di demekê de tê ku welatên navbeynkar hêvî dikin ku pêvajo ji nû ve dest pê bike:

Wezîrê Derve yê Omanê Bedr el-Busaidî hefteya borî ragihandibû ku welatê wî mazûvaniya 5 gerên danûstandinên nerasterast ên nukleerî yên îsal kiriye.

Wî diyar kir ku pêvajo berî gera 6emîn hate sekinandin piştî "êrîşên kujer û neqanûnî" yên Îsraîlê yên li ser tesîsên leşkerî û nukleerî yên li Îranê di meha Hezîranê de.

Ev nivîs 39 car hatiye xwendin.